കൈക്കൂലി ആരോപണം…വൈക്കം സി ഐ ഷമീര്‍ ഖാനെതിരെ കേസ് രജിസ്റ്റര്‍ ചെയ്ത് വിജിലന്‍സ്
കോട്ടയം: വൈക്കം സി ഐ ഷമീര്‍ ഖാനെതിരായ കൈക്കൂലി ആരോപണത്തിൽ കേസ് രജിസ്റ്റര്‍ ചെയ്ത് വിജിലന്‍സ്. സിഐക്കെതിരായ വകുപ്പുതല നടപടിയ്ക്കുള്ള റിപ്പോര്‍ട്ട് ഉടന്‍ കൈമാറും. ഗൂഗിള്‍ പേ വഴി 228,000 രൂപ സി ഐ കൈക്കൂലിയായി വാങ്ങിയതായി കണ്ടെത്തിയിരുന്നു. കഴിഞ്ഞ ദിവസം വൈക്കം സിഐ ഓഫീസില്‍ വിജിലന്‍സിന്റെ മിന്നല്‍ പരിശോധന നടത്തിയിരുന്നു.
സ്റ്റേഷന്‍ പരിധിയിലുള്ള ടിപ്പര്‍, ടോറസ്, ലോറിക്കാരില്‍ നിന്നും, മണ്ണ് മാഫിയകളില്‍ നിന്നും, സ്റ്റേഷനില്‍ രജിസ്റ്റര്‍ ചെയ്യുന്ന വിവിധ കേസുകളിലെ പ്രതികളില്‍ നിന്നും വ്യാപകമായി കൈക്കൂലി വാങ്ങുന്നുവെന്ന രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന. നേരിട്ടും യുപിഐ ട്രാന്‍സാക്ഷന്‍ വഴിയും പണം വാങ്ങിയെന്നായിരുന്നു പരാതി ലഭിച്ചത്.
