സർക്കാർ കോളേജ് ഹോസ്റ്റലുകളുടെ പ്രവർത്തനത്തിൽ വൻ മാറ്റം… പുതിയ സർക്കുലറുമായി വിദ്യാഭ്യാസ വകുപ്പ്

സംസ്ഥാനത്തെ സർക്കാർ കോളേജ് ഹോസ്റ്റലുകളുടെ പ്രവർത്തനം കൂടുതൽ സുതാര്യവും വ്യവസ്ഥാപിതവുമാക്കുന്നതിനായി ഉന്നത വിദ്യാഭ്യാസ വകുപ്പ് സമഗ്രമായ മാർഗ്ഗനിർദ്ദേശങ്ങൾ പുറപ്പെടുവിച്ചു. ഹോസ്റ്റലുകളിലെ വാർഡൻ, ട്യൂട്ടർ നിയമനം, മധ്യവേനലവധിക്കാലത്തെ പ്രവർത്തനം, അനധികൃത താമസക്കാരെ ഒഴിവാക്കൽ എന്നിവ സംബന്ധിച്ച് കോളേജ് വിദ്യാഭ്യാസ ഡയറക്ടറേറ്റാണ് പുതിയ സർക്കുലർ ഇറക്കിയിരിക്കുന്നത്.

ഹോസ്റ്റലുകളുടെ നടത്തിപ്പുമായി ബന്ധപ്പെട്ട് ഡ്രായിങ് ആൻഡ് ഡിസ്ബർസിങ് അധികാരമുള്ള അധ്യാപകരെയാണ് പ്രിൻസിപ്പൽമാർ വാർഡനായി നിയമിക്കേണ്ടത്. അധ്യാപകരുടെ സമ്മതം രേഖാമൂലം വാങ്ങിയ ശേഷം കോളേജ് കൗൺസിൽ യോഗം ചേർന്ന് എടുക്കുന്ന തീരുമാനത്തിന്‍റെ അടിസ്ഥാനത്തിലായിരിക്കണം നിയമനം. വനിതാ ഹോസ്റ്റലുകളിൽ പുരുഷ അധ്യാപകരെ വാർഡനായി നിയമിക്കുന്നതിന് മുൻപായി കോളേജ് വിദ്യാഭ്യാസ വകുപ്പ് ഡയറക്ടറേറ്റിൽ നിന്ന് മുൻകൂർ അനുമതി നേടിയിരിക്കണം. വാർഡൻ, ട്യൂട്ടർ നിയമന ഉത്തരവുകളിൽ കൗൺസിൽ തീരുമാനം കൃത്യമായി പരാമർശിക്കണമെന്നും, ഓരോ നിയമനവും ജൂൺ 1 മുതൽ മാർച്ച് 31 വരെയുള്ള ഒരു അധ്യയന വർഷത്തേക്ക് മാത്രമായിരിക്കും നിജപ്പെടുത്തുമെന്നും സർക്കുലറിൽ വ്യക്തമാക്കുന്നു. ഈ നിയമനങ്ങൾക്കെല്ലാം കോളേജ് വിദ്യാഭ്യാസ ഡയറക്ടറുടെ സാധൂകരണ ഉത്തരവ് യഥാസമയം വാങ്ങിയിരിക്കണം. കൂടാതെ, താമസിക്കുന്ന വിദ്യാർത്ഥികളുടെ പഠനനിലവാരം ഉയർത്തുന്നതിനായി ഓരോ അക്കാദമിക വർഷവും ട്യൂട്ടർമാരെയും നിയമിക്കേണ്ടതാണ്.

സർവ്വകലാശാലകൾ മധ്യവേനലവധി (ഏപ്രിൽ-മേയ് മാസങ്ങളിൽ) പ്രഖ്യാപിക്കുമ്പോൾ കോളേജുകൾക്കൊപ്പം ഹോസ്റ്റലുകൾക്കും അവധിയായിരിക്കും. എന്നാൽ സർവ്വകലാശാല പരീക്ഷകളോ സെമസ്റ്റർ ക്ലാസുകളോ മറ്റ് അടിയന്തര സാഹചര്യങ്ങളോ ഉള്ളപക്ഷം, പരീക്ഷാ ടൈംടേബിളോ ക്ലാസ് ഷെഡ്യൂളോ ലഭ്യമാക്കി ഡയറക്ടറുടെ മുൻകൂർ അനുമതി വാങ്ങിയ ശേഷം മാത്രമേ മാർച്ച് 31-ന് ശേഷവും ഹോസ്റ്റലുകൾ പ്രവർത്തിക്കാൻ പാടുള്ളൂ. ഇത്തരം സാഹചര്യങ്ങളിൽ നിലവിലെ വാർഡന്‍റെയോ ട്യൂട്ടറുടെയോ കാലാവധി ദീർഘിപ്പിക്കുകയോ പുതിയ നിയമനം നടത്തുകയോ ചെയ്ത് സാധൂകരണം തേടേണ്ടതാണ്. ഹോസ്റ്റലുകളിലെ ക്ലാർക്കുമാർക്ക് മധ്യവേനലവധി ബാധകമല്ലെന്നും, അവധിക്കാലത്ത് പ്രവർത്തിക്കുന്ന ഹോസ്റ്റലുകളിൽ 20 വിദ്യാർത്ഥികൾക്ക് ഒരു കുക്ക് എന്ന അനുപാതത്തിൽ (20:1) മാത്രമേ പാചകക്കാരെ അനുവദിക്കാവൂ എന്നും സർക്കുലറിൽ നിഷ്കർഷിക്കുന്നു.

ഹോസ്റ്റലുകളിൽ അനധികൃതമായി ആളുകൾ തങ്ങുന്നത് തടയാൻ വാർഡൻമാർക്ക് കർശന നിർദ്ദേശമാണ് നൽകിയിട്ടുള്ളത്. അതാത് കോളേജുകളിലെ വിദ്യാർത്ഥികൾ മാത്രമാണ് ഹോസ്റ്റലുകളിൽ പ്രവേശനം നേടിയിട്ടുള്ളതെന്ന് വാർഡൻമാർ ഉറപ്പുവരുത്തണം. പുറത്തുനിന്നുള്ളവരെയോ മറ്റ് സ്ഥാപനങ്ങളിലെ വിദ്യാർത്ഥികളെയോ യാതൊരു കാരണവശാലും താമസിപ്പിക്കാൻ പാടില്ല. ഹോസ്റ്റലിൽ അഡ്മിഷൻ എടുത്തവർ, അവധിക്ക് സ്വന്തം വീടുകളിൽ പോയവർ, നിലവിൽ തങ്ങുന്നവർ എന്നിവരുടെ കണക്കുകൾ കൃത്യമായി ഒത്തുനോക്കി അനധികൃത താമസക്കാരില്ലെന്ന് ഉറപ്പാക്കേണ്ടതുണ്ട്. പുറത്തുനിന്നുള്ളവരോ അനധികൃത താമസക്കാരോ ഉണ്ടെന്ന് ശ്രദ്ധയിൽപ്പെട്ടാൽ വാർഡൻ പ്രിൻസിപ്പലിനെ രേഖാമൂലം അറിയിക്കുകയും നേരിട്ട് ഇടപെട്ട് ഒഴിവാക്കുകയും വേണം. സാധ്യമായില്ലെങ്കിൽ നിയമപരമായ നടപടികൾ സ്വീകരിക്കണമെന്നും ഉത്തരവിൽ വ്യക്തമാക്കുന്നു.