‘അയോധ്യ ഫണ്ട് വെട്ടിപ്പ് സംഘപരിവാർ രാഷ്ട്രീയത്തിന്റെ തനിനിറം’… പ്രതിപക്ഷ നേതാവ്

തിരുവനന്തപുരം: അയോധ്യ രാമക്ഷേത്ര നിർമ്മാണവുമായി ബന്ധപ്പെട്ട് പൊതുജനങ്ങളിൽ നിന്നും സമാഹരിച്ച സംഭാവനകളിൽ വൻ ക്രമക്കേട് നടന്നതായി പുറത്തുവരുന്ന വാർത്തകൾ അതീവ ഗൗരവമുള്ളതാണെന്ന് പ്രതിപക്ഷ നേതാവ് പിണറായി വിജയൻ. സംഘപരിവാർ രാഷ്ട്രീയത്തിന്റെ തനിനിറം വ്യക്തമാക്കുന്ന ഏറ്റവും ഒടുവിലത്തെ ഉദാഹരണമാണ് അയോധ്യയിലെ ക്ഷേത്ര ഫണ്ട് വെട്ടിപ്പ്. ഈ വിഷയത്തിൽ സുപ്രീം കോടതിയുടെ നേരിട്ടുള്ള മേൽനോട്ടത്തിൽ നിഷ്പക്ഷമായ ഉന്നതതല അന്വേഷണം പ്രഖ്യാപിക്കാൻ കേന്ദ്ര സർക്കാർ തയ്യാറാകണമെന്നും പിണറായി വിജയൻ ആവശ്യപ്പെട്ടു.

ജനങ്ങളുടെ വിശ്വാസത്തെയും വൈകാരികതയേയും രാഷ്ട്രീയ നേട്ടങ്ങൾക്കായി ചൂഷണം ചെയ്തവർ അതിന്റെ മറവിൽ സംഘടിത സാമ്പത്തിക തട്ടിപ്പ് കൂടി നടത്തിയതായാണ് മനസ്സിലാക്കേണ്ടത്. സംഘപരിവാർ സംഘടനകളുടെ ഉന്നതങ്ങളിൽ ബന്ധമുള്ളവരാണ് ഈ ട്രസ്റ്റിലുള്ളത്. അയോധ്യയിലെ പ്രാണപ്രതിഷ്ഠ ചടങ്ങുകൾക്കുൾപ്പെടെ കാർമ്മികത്വം വഹിച്ച പ്രധാനമന്ത്രി നരേന്ദ്ര മോദി ഈ വിഷയത്തിൽ ജനങ്ങളോട് പ്രതികരിക്കാൻ ബാധ്യസ്ഥനാണെന്നും അദ്ദേഹം കൂട്ടിച്ചേർത്തു. അയോധ്യ ഫണ്ട് വെട്ടിപ്പ് സംഭവത്തിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥിനെതിരെയും പ്രതിപക്ഷ നിരയിൽ നിന്നും രൂക്ഷവിമർശനം ഉയരുന്നുണ്ട്. യോഗി ആദിത്യനാഥ് ഇടയ്ക്കിടയ്ക്ക് അയോധ്യയിൽ സന്ദർശനം നടത്തിയിരുന്നത് അവിടെ നടന്നുകൊണ്ടിരുന്ന കൊള്ളയ്ക്ക് മേൽനോട്ടം വഹിക്കാനായിരുന്നോ എന്ന് കഴിഞ്ഞ ദിവസം സമാജ്‌വാദി പാർട്ടി അധ്യക്ഷൻ ചോദിച്ചിരുന്നു.

സംഭവവുമായി ബന്ധപ്പെട്ട സിസിടിവി ദൃശ്യങ്ങളിൽ കൃത്രിമം നടന്നതായാണ് പ്രത്യേക അന്വേഷണ സംഘത്തിന്റെ കണ്ടെത്തൽ. എന്നാൽ യോഗി ആദിത്യനാഥ് നിരന്തരം അയോധ്യയിലെത്തിയിട്ടും എന്തുകൊണ്ടാണ് ഈ ക്രമക്കേടുകൾ മുൻപ് തന്നെ കണ്ടെത്താതിരുന്നതെന്നും അദ്ദേഹം ചോദ്യമുന്നയിച്ചു. വിഷയത്തിൽ കേന്ദ്ര-സംസ്ഥാന സർക്കാരുകൾ പ്രതിക്കൂട്ടിലായതോടെ വരും ദിവസങ്ങളിൽ പ്രതിഷേധം കൂടുതൽ ശക്തമാക്കാനാണ് പ്രതിപക്ഷത്തിന്റെ തീരുമാനം.