‘ബാലറ്റ് ആണ് ഉപയോഗിച്ചത്, കോൺഗ്രസിന് എത്ര സീറ്റ് കിട്ടിയെന്ന് ഊഹിക്കാമോ?..

നാല് സംസ്ഥാനങ്ങളിലായി നടന്ന ലെജിസ്ലേറ്റീവ് കൗൺസിൽ തെരഞ്ഞെടുപ്പിൽ കോൺഗ്രസിനുണ്ടായ കനത്ത പരാജയത്തിന് പിന്നാലെ, പരിഹാസവുമായി പ്രധാനമന്ത്രി നരേന്ദ്ര മോദി. വോട്ടിങ് യന്ത്രങ്ങളിൽ തിരിമറി നടക്കുന്നുണ്ടെന്ന് ആരോപിച്ച് ബാലറ്റ് പേപ്പർ രീതിയിലേക്ക് മടങ്ങണമെന്ന് കോൺഗ്രസ് ആവശ്യപ്പെടുന്ന സമയത്ത് നടന്ന തെരഞ്ഞെടുപ്പിലെ ദയനീയ പരാജയം ചൂണ്ടിക്കാട്ടിയാണ് പ്രധാനമന്ത്രിയുടെ ട്രോൾ. എംഎൽസി തെരഞ്ഞെടുപ്പുകൾ നടന്നത് ബാലറ്റ് പേപ്പറുകൾ ഉപയോഗിച്ചാണെന്നും മോദി എക്‌സിൽ കുറിച്ചു.

‘4 സംസ്ഥാനങ്ങളിലെ (ഉത്തർപ്രദേശ്, മഹാരാഷ്ട്ര, ബിഹാർ, കർണാടക) 28 സീറ്റുകളിൽ എം.എൽ.സി തെരഞ്ഞെടുപ്പ് നടന്നു. ബാലറ്റ് പേപ്പറുകൾ ഉപയോഗിച്ചായിരുന്നു തെരഞ്ഞെടുപ്പ്. കോൺഗ്രസ് എത്ര സീറ്റുകൾ നേടി എന്ന് ഊഹിക്കാമോ?’ ഒരു കണ്ണ് അടച്ചുപിടിച്ചുള്ള ഇമോജിയോടെയാണ് എക്സിൽ പ്രധാനമന്ത്രി കോൺഗ്രസിനെ പരിഹസിച്ചത്.

നാല് സംസ്ഥാനങ്ങളിലെ 28 ലെജിസ്ലേറ്റീവ് കൗൺസിൽ സീറ്റുകളിലേക്ക് നടന്ന തെരഞ്ഞെടുപ്പിൽ കോൺഗ്രസിന് ഒരു സീറ്റിൽ പോലും വിജയിക്കാനായില്ല. നേരത്തെ കൈവശമുണ്ടായിരുന്ന സീറ്റുകൾ പോലും കോൺഗ്രസിന് നഷ്ടമായി. കർണാടകയിലാണ് കോൺഗ്രസിന് കനത്ത തിരിച്ചടിയുണ്ടായത്. സിദ്ധരാമയ്യയെ മാറ്റി ഡികെ ശിവകുമാറിനെ മുഖ്യമന്ത്രിയാക്കി കോൺഗ്രസ് മുഖം മിനുക്കിയെങ്കിലും അത് തെരഞ്ഞെടുപ്പിൽ പ്രതിഫലിച്ചില്ല.