‘ഹിന്ദി അറിയില്ലെങ്കിൽ പഠിപ്പിക്കാം’… ഭാഷാ തർക്കത്തെ തുടർന്ന് കേരള എംഎൽഎമാർ…

ന്യൂഡൽഹി: ഹിന്ദി ഭാഷയെച്ചൊല്ലിയുള്ള തർക്കത്തെ തുടർന്ന് ദേശീയ വനിതാ കമ്മിഷന്റെ ദ്വിദിന പരിശീലന പരിപാടിയിൽ നിന്ന് കേരളത്തിലെ വനിതാ എംഎൽഎമാർ ഇറങ്ങിപ്പോയി. രാജ്യത്തെ വനിതാ നിയമസഭാംഗങ്ങൾക്ക് ജനാധിപത്യ സംവിധാനത്തിലും നിയമനിർമാണത്തിലും പരിശീലനം നൽകുന്നതിനായി സംഘടിപ്പിച്ച പരിപാടിയിലാണ് ഭാഷാ വിവാദമുണ്ടായത്. രാജ്യത്തെ വിവിധ സംസ്ഥാനങ്ങളിൽ നിന്നും കേന്ദ്രഭരണ പ്രദേശങ്ങളിൽ നിന്നുമായി 390ലേറെ എംഎൽഎമാർ പങ്കെടുത്ത പരിപാടിയിൽ ആശയവിനിമയത്തിനായി ഹിന്ദി മാത്രം ഉപയോഗിച്ചതാണ് കേരളത്തിലെ എംഎൽഎമാർ ചോദ്യം ചെയ്തത്.

ഹിന്ദി രാഷ്ട്രഭാഷയാണെന്നും ചർച്ചകൾ ഹിന്ദിയിൽ തന്നെ നടക്കുമെന്നും ഉത്തരേന്ത്യയിൽ നിന്നുള്ള ചില എംഎൽഎമാർ നിലപാടെടുത്തതായാണ് കേരള സംഘം ആരോപിക്കുന്നത്. ഹിന്ദി അറിയില്ലെങ്കിൽ പഠിപ്പിക്കാമെന്ന് ഉത്തർപ്രദേശിൽ നിന്നുള്ള ഒരു എംഎൽഎ വെല്ലുവിളിച്ചതായും കേരളത്തിലെ അംഗങ്ങൾ പറയുന്നു. തുടർന്ന് പരിശീലന ഹാളിൽ ‘ജയ് ശ്രീറാം’, ‘ഭാരത് മാതാ കി ജയ്’ തുടങ്ങിയ മുദ്രാവാക്യങ്ങൾ ഉയർന്നതായും കേരള നിയമസഭാ ഡെപ്യൂട്ടി സ്പീക്കർ ഷാനിമോൾ ഉസ്മാൻ ആരോപിച്ചു. ഇത്രയേറെ പ്രതിഷേധങ്ങൾ ഉണ്ടായിട്ടും ദേശീയ വനിതാ കമ്മിഷൻ ചെയർപേഴ്സൺ വിജയ രഹത്കർ വിഷയത്തിൽ ഇടപെട്ടില്ലെന്നാണ് മന്ത്രി ബിന്ദു കൃഷ്ണയുടെ ആരോപണം. ദേശീയതലത്തിൽ സംഘടിപ്പിച്ച പരിപാടിയിൽ എല്ലാ സംസ്ഥാനങ്ങളിൽ നിന്നുള്ള ജനപ്രതിനിധികളെയും ഉൾക്കൊള്ളുന്ന തരത്തിൽ പരിശീലന മൊഡ്യൂൾ തയ്യാറാക്കാത്തതിൽ നിരാശയുണ്ടെന്ന് മന്ത്രി കെ.എ. തുളസിയും പ്രതികരിച്ചു.

ഹിന്ദി ഭാഷയല്ല പ്രശ്നമെന്നും ദേശീയതലത്തിലുള്ള പരിപാടിയിൽ എല്ലാ എംഎൽഎമാരെയും ഉൾക്കൊള്ളുന്ന സമീപനം കമ്മിഷന്റെ ഭാഗത്തുനിന്നുണ്ടായില്ലെന്നുമാണ് ഫാത്തിമ തഹ്‌ലിയയുടെ പ്രതികരണം. നേതൃത്വപാടവം, നിയമനിർമാണം, പൊതുനയം, ലിംഗസമത്വം തുടങ്ങിയ വിഷയങ്ങളിലായിരുന്നു പരിശീലന പരിപാടിയിലെ പ്രധാന സെഷനുകൾ. ജനപ്രതിനിധികൾക്ക് അനുഭവങ്ങൾ പങ്കുവയ്ക്കുന്നതിനുള്ള പ്രത്യേക സെഷനുകളും ഉണ്ടായിരുന്നു. ഫരീദാബാദിൽ നടന്ന പരിപാടിയിൽ കേരളത്തിൽ നിന്ന് ഉഷാ വിജയൻ, കെ.കെ. രമ, ഉമ തോമസ്, വിദ്യാ ബാലകൃഷ്ണൻ എന്നിവരും പങ്കെടുത്തു. ലോക്സഭാ സ്പീക്കർ ഓം ബിർളയായിരുന്നു പരിപാടിയുടെ ഉദ്ഘാടകൻ. അതേസമയം, ഹിന്ദി ഭാഷാ വിഷയത്തിൽ ദേശീയ വനിതാ കമ്മിഷൻ നേരത്തെയും വിമർശനം നേരിട്ടിട്ടുണ്ടെന്നാണ് കേരളത്തിലെ എംഎൽഎമാരുടെ ആരോപണം.