സവർക്കറെ പുകഴ്ത്തുന്ന ചോദ്യാവലി; അധ്യാപകന് സസ്പെൻഷൻ
കാസർകോട് സ്കൂൾ ക്വിസിൽ സവർക്കറെ പുകഴ്ത്തുന്ന ചോദ്യാവലി തയ്യാറാക്കിയ അധ്യാപകന് സസ്പെൻഷൻ. അധ്യാപകനായ ഗുരു പ്രസാദിനെയാണ് അന്വേഷണ വിധേയമായി വിദ്യാഭ്യാസ വകുപ്പ് സസ്പെൻഡ് ചെയ്തത്. കുമ്പള എയുപിഎസ് സ്കൂളിലെ അധ്യാപകനാണ് ഗുരുപ്രസാദ്. കാസർകോട് കുമ്പള, മഞ്ചേശ്വരം ഉപ ജില്ലകളിലെ സ്കൂളുകളിൽ നടത്തിയ ക്വിസ് മത്സരത്തിൽ തയാറാക്കിയ ചോദ്യാവലിയാണ് വിവാദമായത്. പൊതു വിദ്യാഭ്യാസ വകുപ്പ് മന്ത്രിയുടെ നിർദേശത്തെ തുടർന്ന് പൊതുവിദ്യാഭ്യാസ ഡയറക്ടറാണ് അധ്യാപകനെ സസ്പെൻഡ് ചെയ്തത്. തെറ്റിദ്ധാരണ പരത്തുന്ന ചോദ്യം തയ്യാറാക്കിയത് ഗൗരവതരമെന്നാണ് അന്വേഷണ റിപ്പോർട്ടിലുള്ളത്.
ഓഗസ്റ്റ് 6 ന് കാസർകോട് ജില്ലയിലെ കുമ്പള, മഞ്ചേശ്വരം ഉപ ജില്ലകളിലെ സ്കൂളുകളിൽ ഫ്രീഡം ക്വിസ് എന്ന പേരിലാണ് ക്വിസ് മത്സരം സംഘടിപ്പിച്ചത്. ‘ബ്രിട്ടിഷുകാരുടെ കയ്യിൽനിന്ന് ഏറ്റവും കൂടുതൽ ശിക്ഷ ലഭിച്ച സ്വാതന്ത്ര്യ സമര സേനാനി?’ ആര് എന്നതായിരുന്നു വിവാദമായ ചോദ്യം. ഇതിനുള്ള ഉത്തരമായി വിഡി സവർക്കർ എന്നാണ് അധ്യാപകർക്കു നൽകിയ ഉത്തരസൂചികയിൽ രേഖപ്പെടുത്തിയിരുന്നത്. 15 ചോദ്യങ്ങൾക്കു പുറമേ നൽകിയ 5 ടൈ ബ്രേക്കർ ചോദ്യങ്ങളിൽ അവസാനത്തേതായിരുന്നു ഈ ചോദ്യം.
