മകളെ വിവാഹം കഴിച്ചു നൽകാത്തതിലെ പക… പിതാവിനെയും മകനെയും വിളിച്ചുവരുത്തി….

തിരുവനന്തപുരം നഗരൂരിൽ പിതാവിനെയും മകനെയും ഒരു വീട്ടിലേക്ക് വിളിച്ചുവരുത്തി ചങ്ങലയിൽ ബന്ധിച്ച് അതിക്രൂരമായി മർദ്ദിച്ച കേസിൽ പ്രധാന പ്രതിയെ പോലീസ് തിരിച്ചറിഞ്ഞു. സുധീഷ് എന്നയാളുടെ നേതൃത്വത്തിലുള്ള നാലംഗ സംഘമാണ് വടശ്ശേരിക്കോണം സ്വദേശി അനിൽകുമാറിനെയും അദ്ദേഹത്തിന്റെ 20 വയസ്സുകാരനായ മകനെയും ക്രൂരമായി പീഡിപ്പിച്ചത്. അനിൽകുമാറിന്റെ മകളെ വിവാഹം ചെയ്തു നൽകാത്തതിലുള്ള കടുത്ത വ്യക്തിവൈരാഗ്യമാണ് ഈ ഭീകരമായ ആക്രമണത്തിന് പിന്നിലെന്ന് പോലീസ് വ്യക്തമാക്കി.

അനിൽകുമാറിന്റെ ചെവിയിൽ സ്ക്രൂഡ്രൈവർ കുത്തിക്കയറ്റിയും, നാക്കിൽ പ്ലെയർ കൊണ്ട് അമർത്തിപ്പിടിച്ചും, കൈനഖങ്ങൾ വലിച്ചുപറിച്ചുമായിരുന്നു സംഘത്തിന്റെ ക്രൂര വിനോദം. മേസ്തിരി പണി ചെയ്യുന്ന അനിൽകുമാറിനെ ജോലി ആവശ്യത്തിനെന്ന് പറഞ്ഞാണ് ഇന്നലെ രാവിലെ സുധീഷ് ഒരു വീട്ടിലേക്ക് വിളിച്ചുവരുത്തുന്നത്. കൃത്യം നടന്ന വീടിന്റെ ഉടമസ്ഥന്റെ ചെറുമകനാണ് പ്രധാന പ്രതിയായ സുധീഷ്. വീട്ടിലെത്തിച്ച ഉടൻ തന്നെ അനിൽകുമാറിനെ ചങ്ങലയിൽ ബന്ധിച്ച് സംഘം ക്രൂരമായി മർദ്ദിക്കുകയായിരുന്നു. അനിൽകുമാറിനെ മർദ്ദിച്ചവശനാക്കിയ ശേഷം, അദ്ദേഹത്തിന് റോഡപകടം പറ്റിയെന്ന് കള്ളം പറഞ്ഞ് 20 വയസ്സുകാരനായ മകനെയും സംഘം ഇതേ വീട്ടിലേക്ക് കബളിപ്പിച്ചു വിളിച്ചുവരുത്തി. തുടർന്ന് മകനെയും ഇവർ ക്രൂരമായി മർദ്ദിച്ചു. എന്നാൽ മർദ്ദനമേറ്റ മകൻ എങ്ങനെയോ അവിടെനിന്ന് രക്ഷപ്പെട്ട് വർക്കല പോലീസിൽ വിവരമറിയിക്കുകയായിരുന്നു.

തുടർന്ന് പോലീസ് സ്ഥലത്തെത്തി നടത്തിയ വിശദമായ പരിശോധനയിലാണ് ഞെട്ടിക്കുന്ന പീഡനവിവരങ്ങൾ പുറത്തുവന്നത്. പ്രതികൾ കൃത്യം നടത്തിയ വീട്ടിൽ നിന്ന് മാരകായുധങ്ങൾക്ക് പുറമേ സ്ഫോടകവസ്തുക്കളും പോലീസ് കണ്ടെടുത്തു. സുധീഷിന്റെ നേതൃത്വത്തിലുള്ള നാലംഗ സംഘമാണ് തങ്ങളെ അക്രമിച്ചതെന്ന് പരിക്കേറ്റ അനിൽകുമാർ പോലീസിന് മൊഴി നൽകിയിട്ടുണ്ട്. ഒരു വർഷം മുൻപ് അനിൽകുമാറിന്റെ മകളെ വിവാഹം കഴിക്കാൻ സുധീഷ് ആലോചിച്ചിരുന്നുവെങ്കിലും അനിൽകുമാർ ഈ ബന്ധത്തിന് തയ്യാറായിരുന്നില്ല. ഇതേത്തുടർന്നുണ്ടായ പകയാണ് ഈ ആസൂത്രിത ആക്രമണത്തിന് കാരണം. ഒളിവിൽ പോയ പ്രതികൾക്കായി പോലീസ് അന്വേഷണം ഊർജ്ജിതമാക്കി.