ബേബി മെമ്മോറിയല് ആശുപത്രിയിലെ ചികിത്സാ പിഴവ് ആരോപണം… ഒന്നരവയസ്സുകാരൻ….
കണ്ണൂർ: പയ്യന്നൂർ ബേബി മെമ്മോറിയൽ ആശുപത്രിയിൽ നിന്നും അനസ്തേഷ്യ നൽകിയതിന് പിന്നാലെ ഗുരുതരാവസ്ഥയിലായി വെന്റിലേറ്ററിൽ ചികിത്സയിൽ കഴിഞ്ഞിരുന്ന ഒന്നരവയസ്സുകാരൻ മരണത്തിന് കീഴടങ്ങി. എരമം സ്വദേശികളായ സൂരജ്-വിജിഷ ദമ്പതികളുടെ മകൻ ദേവാൻഷ് സൗര്യയാണ് കണ്ണൂർ ബേബി മെമ്മോറിയൽ ആശുപത്രിയിൽ ചികിത്സയിലിരിക്കെ മരണമടഞ്ഞത്. പയ്യന്നൂർ ബേബി മെമ്മോറിയൽ ആശുപത്രി അധികൃതരുടെ ഭാഗത്തുനിന്നുണ്ടായ ഗുരുതരമായ ചികിത്സാ പിഴവാണ് കുട്ടിയുടെ മരണത്തിന് കാരണമായതെന്ന ശക്തമായ ആരോപണവുമായി കുടുംബം രംഗത്തെത്തി.
ചുണ്ടിന് ചെറിയ രീതിയിൽ മുറിവ് പറ്റിയതിനെ തുടർന്നാണ് കഴിഞ്ഞ ഞായറാഴ്ച കുട്ടിക്ക് ചെറിയൊരു സർജറി നടത്തുന്നതിനായി പയ്യന്നൂർ ബേബി മെമ്മോറിയൽ ആശുപത്രിയിൽ പ്രവേശിപ്പിച്ചത്. എന്നാൽ തുടർനടപടികളുടെ ഭാഗമായി ഡോക്ടർമാർ കുട്ടിക്ക് അനസ്തേഷ്യ നൽകിയതോടെ കുട്ടി പെട്ടെന്ന് ബോധരഹിതനാവുകയായിരുന്നു. കുട്ടിയുടെ ആരോഗ്യസ്ഥിതി പെട്ടെന്ന് വഷളായതിനെ തുടർന്ന് വിദഗ്ദ്ധ ചികിത്സയ്ക്കായി ഉടൻ തന്നെ കണ്ണൂർ ബേബി മെമ്മോറിയൽ ആശുപത്രിയിലേക്ക് മാറ്റുകയായിരുന്നു. കണ്ണൂരിലെ ആശുപത്രിയിൽ എത്തിച്ച കുട്ടിയെ തീവ്രപരിചരണ വിഭാഗത്തിൽ പ്രവേശിപ്പിക്കുകയും വെന്റിലേറ്ററിന്റെ സഹായത്തോടെ ജീവൻ നിലനിർത്താൻ ശ്രമിക്കുകയുമായിരുന്നു. ഇവിടെ ചികിത്സയിൽ തുടർന്നു വരികയായിരുന്ന കുട്ടിയുടെ നില കൂടുതൽ മോശമാവുകയും ഒടുവിൽ മരണപ്പെടുകയുമായിരുന്നു. പയ്യന്നൂർ ബേബി മെമ്മോറിയൽ ആശുപത്രിയിലെ ഡോക്ടർമാരുടെ അനാസ്ഥയും കൃത്യതയില്ലാത്ത ചികിത്സയുമാണ് കുട്ടി ബോധരഹിതനാകാനും തുടർന്നുണ്ടായ മരണത്തിനും കാരണമെന്നാണ് മാതാപിതാക്കളും ബന്ധുക്കളും ഉറപ്പിച്ചു പറയുന്നത്. സംഭവത്തിൽ പോലീസിൽ പരാതി നൽകാനും കർശനമായ നിയമനടപടികളുമായി മുന്നോട്ടുപോകാനുമാണ് കുടുംബത്തിന്റെ തീരുമാനം.
