ആർഎസ്എസ് പരിപാടിയിൽ മുഖ്യാതിഥിയായി കേന്ദ്ര സർവകലാശാല വിസി… ഒപ്പം രജിസ്ട്രാറും….
കാഞ്ഞങ്ങാട്: പെരിയ കേരള കേന്ദ്ര സർവകലാശാല വൈസ് ചാൻസലർ ആർഎസ്എസ് സംഘടിപ്പിച്ച പരിപാടിയിൽ മുഖ്യാതിഥിയായി പങ്കെടുത്തത് വിവാദത്തിലേക്ക്. കാഞ്ഞങ്ങാട്ട് ബുധനാഴ്ച നടന്ന ആർഎസ്എസിന്റെ ഔദ്യോഗിക പരിപാടിയിലാണ് കേന്ദ്ര സർവകലാശാല വിസി ഡോ. സിദ്ധു പി. അൽഗൂർ പങ്കെടുത്തത്. കാഞ്ഞങ്ങാട്ടുള്ള ഒരു സ്വകാര്യ ഹോട്ടലിൽ വെച്ചായിരുന്നു ഈ പരിപാടി സംഘടിപ്പിച്ചത്. വിസിക്കൊപ്പം സർവകലാശാലയിലെ രജിസ്ട്രാർ ഇൻ ചാർജും പരിപാടിയിൽ പങ്കെടുക്കാൻ എത്തിയിരുന്നു.
നിരവധി മുതിർന്ന ആർഎസ്എസ് നേതാക്കളും സജീവ പ്രവർത്തകരും പങ്കെടുത്ത ചടങ്ങിലാണ് സർവകലാശാലയുടെ ഉയർന്ന പദവിയിലിരിക്കുന്ന ഇരുദ്യോഗസ്ഥരും പങ്കാളികളായത്. ആർഎസ്എസിന്റെ ചരിത്രവും ആശയങ്ങളും പ്രതിപാദിക്കുന്ന പ്രത്യേക സിനിമയുടെ പ്രദർശനവും ഈ ചടങ്ങിനോട് അനുബന്ധിച്ച് ഹോട്ടലിൽ ഒരുക്കിയിരുന്നു. വിസിയും രജിസ്ട്രാറും പരിപാടി തുടങ്ങിയത് മുതൽ അവസാനിക്കുന്നത് വരെ മുഴുവൻ സമയവും ഹോട്ടലിൽ ചെലവഴിക്കുകയും സിനിമ കാണുകയും ചെയ്തുവെന്നാണ് റിപ്പോർട്ടുകൾ.
പരിപാടിക്ക് എത്തിയ വൈസ് ചാൻസലർ സിദ്ധു പി. അൽഗൂറിനെ ആർഎസ്എസ് നേതാക്കൾ ചേർന്ന് പൊന്നാട അണിയിച്ച് ഔദ്യോഗികമായി സ്വീകരിക്കുന്നതിന്റെ ദൃശ്യങ്ങളും ചിത്രങ്ങളും ഇപ്പോൾ സാമൂഹിക മാധ്യമങ്ങളിലൂടെ വ്യാപകമായി പ്രചരിക്കുന്നുണ്ട്. ഉന്നത വിദ്യാഭ്യാസ രംഗത്തെ ഒരു കേന്ദ്ര പൊതുസ്ഥാപനത്തിന്റെ തലപ്പത്തിരിക്കുന്ന വ്യക്തികൾ പരസ്യമായി ഒരു രാഷ്ട്രീയ-സാംസ്കാരിക സംഘടനയുടെ പരിപാടിയിൽ മുഖ്യാതിഥികളായി പങ്കെടുത്തതിനെതിരെ വരും ദിവസങ്ങളിൽ ശക്തമായ രാഷ്ട്രീയ പ്രതിഷേധങ്ങൾ ഉയർന്നുവരാൻ സാധ്യതയുണ്ട്.
