ലഹരി കേസിൽ പെട്ട ആരും സ്റ്റാഫിൽ ഉണ്ടാകില്ല, ലിസ്റ്റ് വരട്ടെ കാണാം….. ആഭ്യന്തര മന്ത്രി രമേശ് ചെന്നിത്തല
തിരുവനന്തപുരം: സംസ്ഥാനത്ത് ലഹരിക്കെതിരെ പൊലീസ് ആരംഭിച്ച ‘ഓപ്പറേഷൻ തൂഫാൻ’ വിജയിപ്പിക്കാൻ ജനങ്ങളുടെ പൂർണ്ണ സഹകരണം വേണമെന്ന് ആഭ്യന്തര മന്ത്രി രമേശ് ചെന്നിത്തല. പൊലീസ് നടപടികൾക്കൊപ്പം പൊതുജനങ്ങളും ഈ പോരാട്ടം ഏറ്റെടുക്കണമെന്ന് മന്ത്രി ആവശ്യപ്പെട്ടു. തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.
തന്റെ പേഴ്സണൽ സ്റ്റാഫ് നിയമനവുമായി ബന്ധപ്പെട്ട് ഡിവൈഎഫ്ഐ ഉന്നയിച്ച ആരോപണങ്ങൾക്കും ആഭ്യന്തര മന്ത്രി കൃത്യമായ മറുപടി നൽകി. ലഹരി കേസുകളിൽ പെട്ട ആരും തന്റെ സ്റ്റാഫിൽ ഉണ്ടാകില്ലെന്ന് മന്ത്രി ഉറപ്പിച്ചു പറഞ്ഞു. ആരോപണ വിധേയനായ നഹാസ് സ്റ്റാഫിൽ ഉണ്ടാകുമോ എന്ന ചോദ്യത്തിന്, “ലിസ്റ്റ് വരട്ടെ, അപ്പോൾ അറിയാം” എന്നായിരുന്നു മന്ത്രിയുടെ പ്രതികരണം.
കഴിഞ്ഞ ദിവസമാണ് ആഭ്യന്തര മന്ത്രിയുടെ പേഴ്സണൽ സ്റ്റാഫിൽ ലഹരി കേസിൽപ്പെട്ടയാളുണ്ടെന്ന ആരോപണവുമായി ഡിവൈഎഫ്ഐ രംഗത്തെത്തിയതും രൂക്ഷവിമർശനം ഉന്നയിച്ചതും. ആർ.എസ്.എസ് പരിപാടിയിൽ സർവകലാശാല വൈസ് ചാൻസലർമാർ (വിസിമാർ) പങ്കെടുത്തത് ഒട്ടും ഗുണകരമല്ലെന്നും അവർ ആ പരിപാടിയിൽ പങ്കെടുക്കാൻ പാടില്ലായിരുന്നുവെന്നും രമേശ് ചെന്നിത്തല വ്യക്തമാക്കി.
ഗവർണറെ മുൻനിർത്തി കേരളത്തിന്റെ അക്കാദമിക മേഖലയെ വർഗീയവൽക്കരിക്കാനാണ് സംഘപരിവാർ ശ്രമിക്കുന്നത്. ഇത്തരം നീക്കങ്ങൾക്കെതിരെ ജനാധിപത്യ മതനിരപേക്ഷ കേരളം അതീവ ജാഗ്രതയോടെ ഒന്നിച്ചണിനിരക്കണം. ആഭ്യന്തര മന്ത്രി രമേശ് ചെന്നിത്തല പറഞ്ഞു. ലഹരി മാഫിയക്കെതിരെയുള്ള ആഭ്യന്തര വകുപ്പിന്റെ കർശന നടപടികളുമായി മുന്നോട്ടുപോകുമെന്നും, രാഷ്ട്രീയ ആരോപണങ്ങൾ വികസനത്തെയോ ജനക്ഷേമ നടപടികളെയോ ബാധിക്കില്ലെന്നും വ്യക്തമാക്കുന്നതായിരുന്നു മന്ത്രിയുടെ വാക്കുകൾ.
