കായംകുളത്ത് വയോധികയുടെ മൃതദേഹം കായലിൽ…..കഴുത്തിൽ കയർ കുരുക്കി കല്ലുകെട്ടിയ നിലയിൽ, കൊലപാതകമെന്ന് സംശയം

ആലപ്പുഴ: കായംകുളം കനകക്കുന്നിൽ കായലിൽ വയോധികയെ മരിച്ച നിലയിൽ കണ്ടെത്തി. കനകക്കുന്ന് ജെട്ടിക്ക് സമീപം ഇന്ന് പുലർച്ചെയാണ് നാട്ടുകാർ മൃതദേഹം കണ്ടത്. കണ്ടല്ലൂർ സ്വദേശിയായ തങ്കമ്മ (80) ആണ് മരിച്ചതെന്ന് തിരിച്ചറിഞ്ഞു. ഇവരെ ഇന്നലെ മുതൽ കാണാനില്ലെന്ന് കാട്ടി ബന്ധുക്കൾ കനകക്കുന്ന് പോലീസ് സ്റ്റേഷനിൽ പരാതി നൽകിയിരുന്നു. തുടർന്ന് പോലീസും ഫയർഫോഴ്സും സ്ഥലത്തെത്തിയാണ് മൃതദേഹം കരയ്ക്കടിപ്പിച്ചത്.

തങ്കമ്മയുടെ മരണം കൊലപാതകമാണെന്നാണ് പോലീസ് ശക്തമായി സംശയിക്കുന്നത്. മൃതദേഹം കണ്ടെത്തിയ രീതിയാണ് ഇത്തരമൊരു നിഗമനത്തിലേക്ക് പോലീസിനെ നയിക്കുന്നത്. വയോധികയുടെ കഴുത്തിൽ കയർ കുരുക്കി കല്ലുകെട്ടിയ നിലയിലായിരുന്നു മൃതദേഹം. കണ്ടെത്തുമ്പോൾ മൃതദേഹത്തിൽ വസ്ത്രങ്ങൾ ഉണ്ടായിരുന്നില്ല. കായലിൽ താഴ്ന്നു പോകുന്നതിനായി മനഃപൂർവ്വം കല്ലുകെട്ടി താഴ്ത്തിയതാണെന്ന പ്രാഥമിക നിഗമനത്തിലാണ് പോലീസ്. വസ്ത്രങ്ങൾ ഇല്ലാത്തതും സംശയങ്ങൾ വർദ്ധിപ്പിക്കുന്നു.

സംഭവത്തിൽ കനകക്കുന്ന് പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്‌മോർട്ടത്തിനായി ആശുപത്രിയിലേക്ക് മാറ്റി. പോസ്റ്റ്‌മോർട്ടം റിപ്പോർട്ട് പുറത്തുവന്നാൽ മാത്രമേ മരണകാരണം സംബന്ധിച്ച് കൂടുതൽ വ്യക്തത ലഭിക്കുകയുള്ളൂ എന്ന് പോലീസ് അറിയിച്ചു. തങ്കമ്മയ്ക്ക് ആരുമായെങ്കിലും മുൻവൈരാഗ്യം ഉണ്ടായിരുന്നോ, ഒപ്പം ആഭരണങ്ങൾ നഷ്ടപ്പെട്ടിട്ടുണ്ടോ തുടങ്ങിയ കാര്യങ്ങളും പോലീസ് പരിശോധിച്ചു വരികയാണ്.