ചർമം നൽകും മുന്നറിയിപ്പ്; വൃക്കരോഗത്തിന്റെ ഈ ലക്ഷണങ്ങൾ അവഗണിക്കരുത്!

കണ്ണാടിക്കുമുന്നിൽ നിൽക്കുമ്പോൾ ചർമത്തിൽ ചെറിയ മാറ്റങ്ങൾ കാണാറുണ്ടോ? അമിതമായ വരൾച്ച, കാരണം അറിയാത്ത ചൊറിച്ചിൽ, നിറവ്യത്യാസങ്ങൾ, അല്ലെങ്കിൽ കാലുകളിൽ വീക്കം… പലരും ഇവയെ സാധാരണ പ്രശ്നങ്ങളായി കരുതി അവഗണിച്ചേക്കാം. എന്നാൽ, ചിലപ്പോൾ ഇവ ശരീരത്തിലെ ഏറ്റവും പ്രധാനപ്പെട്ട അവയവങ്ങളിലൊന്നായ വൃക്കകൾ തകരാറിലാണ് എന്ന മുന്നറിയിപ്പുകളായിരിക്കും.

വൃക്കകൾ ശരിയായി പ്രവർത്തിക്കാതെ വരുമ്പോൾ രക്തത്തിലെ മാലിന്യങ്ങളും വിഷാംശങ്ങളും ശരീരത്തിൽ അടിഞ്ഞുകൂടുന്നു. ഇതിന്റെ ആദ്യ പ്രതിഫലനം പലപ്പോഴും ചർമത്തിലാണ് കാണപ്പെടുന്നത്. അതുകൊണ്ടുതന്നെ ചർമത്തിലെ ചില അസാധാരണ മാറ്റങ്ങൾ വൃക്കരോഗത്തിന്റെ പ്രാരംഭ സൂചനകളായി കണക്കാക്കപ്പെടുന്നു.

അമിതമായ വരൾച്ചയും പരുക്കനായ ചർമവും

വൃക്കരോഗത്തിന്റെ തുടക്കത്തിൽ തന്നെ ചിലരിൽ ചർമം അമിതമായി വരണ്ടുപോകാം. ചർമം ഇറുകിയതുപോലെയും ചെതുമ്പൽ പോലെ ഇളകുന്നതുപോലെയും തോന്നാം. ശരീരത്തിലെ ധാതുക്കളുടെ സന്തുലിതാവസ്ഥ തകരുന്നതാണ് ഇതിന് പ്രധാന കാരണം.

നിർത്താതെയുള്ള ചൊറിച്ചിൽ

വൃക്കകളുടെ പ്രവർത്തനം മന്ദഗതിയിലാകുമ്പോൾ രക്തത്തിൽ മാലിന്യങ്ങൾ അടിഞ്ഞുകൂടും. ഇതിന്റെ ഫലമായി ശരീരമൊട്ടാകെയോ ചില ഭാഗങ്ങളിലോ അസഹനീയമായ ചൊറിച്ചിൽ അനുഭവപ്പെടാം. സാധാരണ ചർമ്മരോഗങ്ങൾക്ക് ഉപയോഗിക്കുന്ന മരുന്നുകൾ പലപ്പോഴും ഇതിന് ഫലപ്രദമാകില്ല.

മാന്തിപ്പൊളിച്ച പാടുകളും കട്ടിയുള്ള ചർമവും

ചൊറിച്ചിൽ കാരണം നിരന്തരം ചൊറിയുന്നതിലൂടെ ചർമത്തിൽ മുറിവുകളും പാടുകളും രൂപപ്പെടാം. ചിലപ്പോൾ ചർമം കട്ടിയാവുകയും ചെറിയ കുരുക്കൾ രൂപപ്പെടുകയും ചെയ്യാം.

ചർമത്തിന്റെ നിറത്തിൽ മാറ്റം

രക്തത്തിലെ വിഷാംശങ്ങൾ പുറത്തേക്ക് നീങ്ങാതെ കൂടുമ്പോൾ ചർമം വിളറിയതോ ചാരനിറത്തിലോ മഞ്ഞ കലർന്ന തവിട്ടുനിറത്തിലോ മാറാം. ചിലരിൽ കറുത്ത പാടുകളും പ്രത്യക്ഷപ്പെടാറുണ്ട്.

നഖങ്ങൾ പോലും മുന്നറിയിപ്പ് നൽകും

വൃക്കരോഗം നഖങ്ങളെയും ബാധിക്കാം. നഖത്തിന്റെ ഒരു ഭാഗം വെളുപ്പും ബാക്കി ഭാഗം ചുവപ്പോ തവിട്ടുനിറമോ ആകുന്നത് ശ്രദ്ധിക്കേണ്ട ലക്ഷണമാണ്. നഖങ്ങളിൽ വെളുത്ത വരകൾ പ്രത്യക്ഷപ്പെടുന്നതും അവഗണിക്കരുത്.

ശരീരത്തിലെ വീക്കം

ഉപ്പും വെള്ളവും ശരീരത്തിൽ നിന്ന് പുറത്താക്കുന്നതിൽ വൃക്കകൾ പരാജയപ്പെടുമ്പോൾ കൈകാലുകളിലും മുഖത്തും വീക്കം അനുഭവപ്പെടും. പ്രത്യേകിച്ച് കണങ്കാലുകളിലും പാദങ്ങളിലുമുള്ള നീര് വൃക്ക തകരാറിന്റെ പ്രധാന ലക്ഷണങ്ങളിലൊന്നാണ്.

റാഷസുകളും കുമിളകളും

രക്തത്തിലെ യൂറിയ പോലുള്ള മാലിന്യങ്ങൾ വർധിക്കുമ്പോൾ ചർമത്തിൽ ചെറിയ റാഷസുകളോ കുരുക്കളോ രൂപപ്പെടാം. ചില ഗുരുതര കേസുകളിൽ കൈകളിലും കാലുകളിലും കുമിളകൾ പ്രത്യക്ഷപ്പെടുകയും പിന്നീട് പാടുകൾ അവശേഷിപ്പിക്കുകയും ചെയ്യാം.

വയറിലോ പുറകിലോ മുഴകൾ

വയറിന്റെ വശങ്ങളിലോ താഴത്തെ പുറംഭാഗത്തോ കാണുന്ന അസാധാരണ മുഴകൾ വൃക്കയിലെ മുഴകളുടേയോ കാൻസറിന്റേയോ സൂചനയായിരിക്കാം. ഇത്തരം മാറ്റങ്ങൾ കണ്ടാൽ ഉടൻ വിദഗ്ധ പരിശോധന ആവശ്യമാണ്.

ചിലരിൽ ചർമം അമിതമായി കട്ടിയാവുകയും വലിഞ്ഞു മുറുകുകയും ചെയ്യുന്ന ‘നെഫ്രോളജെനിക് സിസ്റ്റമിക് ഫൈബ്രോസിസ്’ പോലുള്ള അപൂർവ അവസ്ഥകളും ഉണ്ടാകാം. കൂടാതെ, കാൽസ്യവും ഫോസ്ഫേറ്റും അസന്തുലിതമാകുമ്പോൾ ചർമത്തിനടിയിൽ ചെറിയ കാൽസ്യം കട്ടകൾ രൂപപ്പെടാനും സാധ്യതയുണ്ട്.

ആർക്കാണ് കൂടുതൽ അപകടസാധ്യത?

പ്രമേഹം, ഉയർന്ന രക്തസമ്മർദം, 65 വയസ്സിന് മുകളിലുള്ളവർ എന്നിവർക്കാണ് വൃക്കരോഗ സാധ്യത കൂടുതലുള്ളത്. ചർമത്തിൽ ഇത്തരം അസാധാരണ മാറ്റങ്ങൾ തുടർച്ചയായി കാണുന്നുണ്ടെങ്കിൽ ഒരു നെഫ്രോളജി വിദഗ്ധനെയോ ഡെർമറ്റോളജിസ്റ്റിനെയോ സമീപിക്കുന്നത് നിർണായകമാണ്.

ചെറിയ ലക്ഷണങ്ങളെന്ന് കരുതി ചർമത്തിലെ മാറ്റങ്ങളെ അവഗണിക്കരുത്. ശരീരം നൽകുന്ന ഇത്തരം മുന്നറിയിപ്പുകൾ ശ്രദ്ധിച്ചാൽ വൃക്കരോഗം നേരത്തേ കണ്ടെത്താനും ചികിത്സ കൂടുതൽ ഫലപ്രദമാക്കാനും കഴിയും. ആരോഗ്യകരമായ ജീവിതശൈലിയും സമയബന്ധിത പരിശോധനകളും വൃക്കകളെ സംരക്ഷിക്കുന്ന ഏറ്റവും നല്ല വഴിയാണ്.