മുഖ്യമന്ത്രി ചർച്ചയ്ക്കായി നേതാക്കൾ ഡൽഹിക്ക്…. വിട്ടുനിന്ന് മുല്ലപ്പള്ളി രാമചന്ദ്രൻ
കേരളത്തിന്റെ മുഖ്യമന്ത്രി ആരാണെന്ന കാര്യത്തിൽ നാളെയോ മറ്റന്നാളോ പ്രഖ്യാപനം ഉണ്ടായേക്കും. ഇതിന്റെ ഭാഗമായി കേരളത്തിലെ മുതിർന്ന കോൺഗ്രസ് നേതാക്കളോട് അടിയന്തരമായി ഡൽഹിയിലെത്താൻ എഐസിസി (AICC) നിർദ്ദേശം നൽകി. കെ. മുരളീധരൻ, കെ. സുധാകരൻ, എം.എം. ഹസ്സൻ, വി.എം. സുധീരൻ, തിരുവഞ്ചൂർ രാധാകൃഷ്ണൻ എന്നിവരോടാണ് രാഹുൽ ഗാന്ധി അടിയന്തരമായി എത്താൻ ആവശ്യപ്പെട്ടത്. മുഖ്യമന്ത്രിയെ നിശ്ചയിക്കുന്നതിൽ ഇവരുടെ നിലപാട് നിർണ്ണായകമാകും.
മുതിർന്ന നേതാവ് മുല്ലപ്പള്ളി രാമചന്ദ്രനെയും വിളിപ്പിച്ചിരുന്നെങ്കിലും അദ്ദേഹം ഡൽഹിയിലേക്കില്ലെന്ന് വ്യക്തമാക്കി. നേതൃത്വത്തിന്റെ ചില നിലപാടുകളിലുള്ള പ്രതിഷേധം അദ്ദേഹം അറിയിച്ചതായാണ് വിവരം. “പല കാര്യങ്ങളും ശരിയായ ശേഷം വരാം” എന്നാണ് അദ്ദേഹം നൽകിയ മറുപടി. മല്ലികാർജുൻ ഖർഗെ, പ്രിയങ്ക ഗാന്ധി എന്നിവരുമായി രാഹുൽ ഗാന്ധി ചർച്ചകൾ നടത്തിക്കഴിഞ്ഞു. സഖ്യകക്ഷി നേതാക്കളുമായും അദ്ദേഹം ഫോണിൽ സംസാരിക്കും. നിലവിലെ ചർച്ചകളിൽ കെ.സി. വേണുഗോപാലിനാണ് മുഖ്യമന്ത്രി സ്ഥാനത്തേക്ക് മുൻതൂക്കം കൽപ്പിക്കപ്പെടുന്നത്.
പുതിയ മന്ത്രിസഭയിൽ ഉപമുഖ്യമന്ത്രി സ്ഥാനം ഉണ്ടാകില്ലെന്നാണ് സൂചന. നിയമസഭാ കക്ഷി യോഗം വിളിച്ച് ഔദ്യോഗിക പ്രഖ്യാപനം നടത്താനാണ് ഹൈക്കമാൻഡ് ആലോചിക്കുന്നത്. മുഖ്യമന്ത്രി പ്രഖ്യാപനത്തിനുള്ള നടപടികൾ ഹൈക്കമാൻഡ് വേഗത്തിലാക്കിയതോടെ കേരള രാഷ്ട്രീയത്തിൽ ആകാംക്ഷ വർദ്ധിച്ചിരിക്കുകയാണ്.
