തിമിരി ബോംബേറ് കേസ്…. മുൻ ഏരിയാ സെക്രട്ടറി ഉൾപ്പെടെ 10 സി.പി.ഐ.എം പ്രവർത്തകർ കുറ്റക്കാർ
വർഷങ്ങൾ നീണ്ട നിയമപോരാട്ടത്തിനൊടുവിൽ തളിപ്പറമ്പ് തിമിരി ബോംബേറ് കേസിൽ നിർണ്ണായക വിധി. ബി.ജെ.പി-ആർ.എസ്.എസ് പ്രവർത്തകരെ ബോംബെറിഞ്ഞ് വധിക്കാൻ ശ്രമിച്ച കേസിൽ സി.പി.ഐ.എം ആലക്കോട് മുൻ ഏരിയാ സെക്രട്ടറി പി.വി. ബാബുരാജ് ഉൾപ്പെടെ പത്ത് പ്രവർത്തകർ കുറ്റക്കാരാണെന്ന് തളിപ്പറമ്പ് ജില്ലാ അഡീഷണൽ സെഷൻസ് കോടതി കണ്ടെത്തി. കുറ്റക്കാർക്കുള്ള ശിക്ഷാവിധി കോടതി നാളെ പ്രഖ്യാപിക്കും.
2011 നവംബർ 27-നാണ് കേസിനാസ്പദമായ സംഭവം നടന്നത്. പ്രദേശത്ത് ആർ.എസ്.എസ് ശാഖ തുടങ്ങുന്നതുമായി ബന്ധപ്പെട്ട തർക്കമാണ് ബോംബേറിലും സംഘർഷത്തിലും കലാശിച്ചത്. മുൻ ഏരിയാ സെക്രട്ടറിയും പഞ്ചായത്ത് അംഗവുമായ പി.വി. ബാബുരാജിനെ കൂടാതെ സി.പി.ഐ.എം പ്രാദേശിക നേതാക്കളും പ്രവർത്തകരുമാണ് കുറ്റക്കാരുടെ പട്ടികയിലുള്ളത്. തിമിരിയിൽ ആർ.എസ്.എസ് പ്രവർത്തകർ ശാഖ ആരംഭിക്കാൻ ശ്രമിച്ചത് സി.പി.ഐ.എം എതിർത്തിരുന്നു. ഇതേച്ചൊല്ലിയുള്ള വൈരാഗ്യമാണ് ആയുധങ്ങളുമായി എത്തി വധശ്രമം നടത്തുന്നതിലേക്ക് നയിച്ചതെന്ന് പ്രോസിക്യൂഷൻ വാദിച്ചു.
പ്രതികൾ കുറ്റക്കാരാണെന്ന് കോടതി കണ്ടെത്തിയതോടെ ശിക്ഷാവിധി എന്താകുമെന്ന ആകാംക്ഷയിലാണ് രാഷ്ട്രീയ കേന്ദ്രങ്ങൾ. നാളെ രാവിലെ കോടതി ശിക്ഷ പ്രഖ്യാപിക്കും. ദീർഘകാലം നീണ്ടുനിന്ന വിചാരണക്കൊടുവിൽ വന്ന വിധി കണ്ണൂരിലെ രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്. വിധിക്ക് പിന്നാലെ സംഘർഷ സാധ്യത കണക്കിലെടുത്ത് പ്രദേശത്ത് പോലീസ് ജാഗ്രത ശക്തമാക്കിയിട്ടുണ്ട്.
