കിറ്റ് വിവാദം…ആരോപണം നിഷേധിച്ച് നടൻ ദേവൻ…
തൃശൂർ വാടാനപ്പള്ളിയിൽ വോട്ടർമാരെ സ്വാധീനിക്കാൻ ബിജെപി കിറ്റ് വിതരണം നടത്തിയെന്ന കോൺഗ്രസ് ആരോപണത്തെ തള്ളി നടനും ബിജെപി നേതാവുമായ ദേവൻ രംഗത്തെത്തി. നേരത്തെ നിശ്ചയിച്ച കുടുംബയോഗങ്ങളിൽ പങ്കെടുക്കാനാണ് താൻ എത്തിയതെന്നും, യോഗം തുടങ്ങാൻ വൈകിയതിനാൽ വിശ്രമിക്കാനാണ് ബിജെപി പ്രവർത്തകന്റെ സുഹൃത്തിന്റെ വീട്ടിൽ കയറിയതെന്നും അദ്ദേഹം വിശദീകരിച്ചു. മണലൂർ മണ്ഡലത്തിൽ ബിജെപി നടത്തുന്ന വലിയ മുന്നേറ്റത്തിൽ ഭയന്ന കോൺഗ്രസ് നടത്തുന്ന നാടകമാണിതെന്നും ദേവൻ ആരോപിച്ചു.
യുഡിഎഫ് സ്ഥാനാർത്ഥി ടി.എൻ. പ്രതാപന്റെ നേതൃത്വത്തിലുള്ള സംഘമാണ് താൻ വിശ്രമിച്ച വീട് വളഞ്ഞ് പ്രതിഷേധിച്ചത്. കിറ്റ് വിതരണത്തിനായി എത്തിയതാണെന്ന് ആരോപിച്ചായിരുന്നു ബഹളം. താൻ ചായ കുടിച്ചിരിക്കുമ്പോഴാണ് കോൺഗ്രസ് പ്രവർത്തകർ എത്തിയതെന്നും പിന്നാലെ സിപിഎം പ്രവർത്തകരും ചേർന്നതോടെ പ്രകടനം സംഘർഷഭരിതമായെന്നും ദേവൻ പറഞ്ഞു. ബിജെപി നേതാക്കൾ സോഷ്യൽ മീഡിയയിലൂടെ മുൻകൂട്ടി അറിയിച്ച പരിപാടിക്കാണ് താൻ എത്തിയതെന്നും അദ്ദേഹം വ്യക്തമാക്കി.
