സർക്കാർ ആശുപത്രികളിലെ ഡോക്ടർമാരുടെ ഒപി സമയം വർദ്ധിപ്പിച്ചു; പ്രതിഷേധവുമായി കെജിഎംഒഎ

സംസ്ഥാനത്തെ സർക്കാർ ആശുപത്രികളിലെ ഡോക്ടർമാരുടെ ഒപി (Out Patient) സമയം വർധിപ്പിച്ചു. പുതിയ ഉത്തരവനുസരിച്ച് രാവിലെ എട്ട് മണി മുതൽ ഉച്ചയ്ക്ക് രണ്ട് മണിവരെ ആയിരിക്കും ഇനി ഒപി സമയം. നേരത്തെ ഇത് ഉച്ചയ്ക്ക് ഒരു മണിവരെ മാത്രമായിരുന്നു.

അതേസമയം, ആശുപത്രി സൂപ്രണ്ടുമാരുടെയും ഡെപ്യൂട്ടി സൂപ്രണ്ടുമാരുടെയും ജോലി സമയവും പുനഃക്രമീകരിച്ചിട്ടുണ്ട്. പുതിയ ക്രമീകരണമനുസരിച്ച് സൂപ്രണ്ടുമാരുടെ ജോലി സമയം രാവിലെ എട്ട് മണി മുതൽ വൈകിട്ട് മൂന്ന് മണിവരെ ആയിരിക്കും. ഡെപ്യൂട്ടി സൂപ്രണ്ടുമാരുടെ ജോലി സമയം രാവിലെ പത്ത് മണി മുതൽ വൈകിട്ട് അഞ്ച് മണിവരെ ആക്കിയാണ് മാറ്റം വരുത്തിയത്.

ഇതിനിടെ ഒപി സമയം കൂട്ടിയ തീരുമാനത്തിനെതിരെ കെജിഎംഒഎ (Kerala Government Medical Officers Association) രംഗത്തെത്തി. ഡോക്ടർമാരുടെ ജോലി ഭാരം വർധിപ്പിക്കുന്ന നടപടിയാണിതെന്നും ഇത് അംഗീകരിക്കാനാവില്ലെന്നും സംഘടന വ്യക്തമാക്കി.

പുതിയ തസ്തികകൾ സൃഷ്ടിച്ച് ഡോക്ടർമാരുടെ കുറവ് പരിഹരിക്കുകയാണ് വേണ്ടതെന്നും, നിലവിലെ ഉത്തരവ് പിൻവലിക്കാത്ത പക്ഷം സംസ്ഥാന വ്യാപകമായി പ്രതിഷേധ പരിപാടികൾ സംഘടിപ്പിക്കുമെന്നും കെജിഎംഒഎ മുന്നറിയിപ്പ് നൽകി.