വോട്ട് തേടി മടങ്ങവേ സ്ഥാനാർത്ഥിയുടെ വാഹനത്തിന് മുന്നിൽ കാട്ടാന
പ്രചാരണം കഴിഞ്ഞ്‌ മടങ്ങുന്നതിനിടെ യുഡിഎഫ് സ്ഥാനാർത്ഥിയുടെ വാഹനം കാട്ടാനയ്ക്കു മുൻപിൽപ്പെട്ടു. യാത്രക്കാർ രക്ഷപ്പെട്ടത് തലനാരിഴയ്ക്ക്. കഴിഞ്ഞ ദിവസം രാത്രി ഒൻപതോടെയായിരുന്നു സംഭവം. ജില്ലാ പഞ്ചായത്ത് മൂന്നാർ ഡിവിഷൻ സ്ഥാനാർത്ഥി സി. നെൽസണും സംഘവും സഞ്ചരിച്ചിരുന്ന ജീപ്പാണ് നല്ലതണ്ണി കല്ലാറിന് സമീപം ഒറ്റക്കൊമ്പന്റെ മുൻപിൽപ്പെട്ടത്.
സ്ഥാനാർത്ഥിയുൾപ്പെടെ നാലുപേരാണ് ജീപ്പിലുണ്ടായിരുന്നത്. ആനയെ കണ്ടതോടെ ഇവർ ജീപ്പ് നിർത്തി. ആന മുന്നോട്ട് നീങ്ങിയതോടെ വാഹനം പിന്നോട്ടെടുത്തു. വീതി കുറഞ്ഞ റോഡിലൂടെ ഏറെ പ്രയാസപ്പെട്ടാണ് ജീപ്പ് പിന്നോട്ടെടുത്തത്. ആനയുടെ ആക്രമണത്തിൽനിന്ന് രക്ഷപ്പെടാൻ അര കിലോമീറ്ററോളം പിന്നോട്ട് പോകേണ്ടിവന്നു. ഈ മേഖലയിൽ കാട്ടാനയാക്രമണം രൂക്ഷമാണ്. ആക്രമണം തടയുന്നതിനായി യാതൊരു നടപടിയും സ്വീകരിക്കുന്നില്ലെന്ന് പരാതിയുണ്ട്.
