ഇന്ത്യയില്‍ ഗൂഗിള്‍ മീറ്റ് സേവനം തടസപ്പെട്ടു; രാജ്യമെമ്പാടും പരാതികള്‍
ലോകത്തിലെ പ്രധാന വീഡിയോ കോണ്‍ഫറന്‍സിംഗ് ആപ്ലിക്കേഷനായ ഗൂഗിള്‍ മീറ്റ് (Google Meet) സേവനം ഇന്ത്യയില്‍ തടസപ്പെട്ടു. ഇന്‍റര്‍നെറ്റ് സേവനങ്ങളുടെ സുഗമമായ പ്രവര്‍ത്തനം നിരീക്ഷിക്കുന്ന സംവിധാനമായ ഡൗണ്‍ഡിറ്റക്റ്ററിന്‍റെ റിപ്പോര്‍ട്ട് പ്രകാരം, ഇന്ന് ഇന്ത്യന്‍ സമയം രാവിലെ 11 മണിയോടെയാണ് ഗൂഗിള്‍ മീറ്റ് സേവനം ഉപഭോക്താക്കള്‍ക്ക് ലഭ്യമല്ലാതായത്. ഗൂഗിള്‍ മീറ്റിലെ സാങ്കേതിക തടസം 11.30-ഓടെ ഏറ്റവും ഉച്ചസ്ഥായിയിലെത്തി. ഗൂഗിള്‍ മീറ്റ് ലഭ്യമാകുന്നില്ലെന്ന് കാണിച്ച് രണ്ടായിരത്തോളം പരാതികള്‍ ഡൗണ്‍ഡിറ്റക്റ്ററില്‍ ഉച്ചതിരിഞ്ഞ് രണ്ട് മണി വരെ റിപ്പോര്‍ട്ട് ചെയ്യപ്പെട്ടു.
ദില്ലി, മുംബൈ, അഹമ്മദാബാദ്, ഹൈദരാബാദ്, കൊല്‍ക്കത്ത, ബെംഗളൂരു, ചെന്നൈ തുടങ്ങി രാജ്യത്തെ പ്രധാന നഗരങ്ങളില്‍ നിന്നെല്ലാം ഗൂഗിള്‍ മീറ്റിലെ പ്രശ്‌നങ്ങള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. ഗൂഗിള്‍ മീറ്റിന്‍റെ വെബ്‌സൈറ്റില്‍ പ്രവേശിക്കാനാകുന്നില്ലെന്നായിരുന്നു പ്രധാനമായും യൂസര്‍മാരുടെ പരാതി. ആകെ പരാതി രേഖപ്പെടുത്തിയവരില്‍ 63 ശതമാനം പേരാണ് ഈ പ്രശ്‌നം ചൂണ്ടിക്കാട്ടിയത്. സെര്‍വര്‍ കണക്ഷന്‍ വിച്ഛേദിക്കപ്പെടുന്നതായി 34 ശതമാനം പേര്‍ റിപ്പോര്‍ട്ട് ചെയ്‌തപ്പോള്‍ വീഡിയോ ക്വാളിറ്റിയില്‍ പ്രശ്‌നം നേരിടുന്നതായും ചെറിയൊരു ശതമാനം ഗൂഗിള്‍ മീറ്റ് ഉപയോക്താക്കള്‍ക്ക് പരാതിയുണ്ട്. എന്നാല്‍ എന്താണ് ഗൂഗിള്‍ മീറ്റ് ഉപഭോക്താക്കള്‍ ഇന്ത്യയില്‍ ഇപ്പോള്‍ നേരിടുന്ന സാങ്കേതികപ്രശ്‌നങ്ങള്‍ക്ക് കാരണം എന്ന് കമ്പനി അധികൃതര്‍ വ്യക്തമാക്കിയിട്ടില്ല
