അച്ഛനെയും ചേട്ടനെയും പേടിയാണ്.. ലഹരി ഉപയോഗിച്ച ശേഷം ലൈംഗികമായുള്ള സംസാരവും ഉപദ്രവവും.. ഞെട്ടിക്കുന്ന വെളിപ്പെടുത്തലുമായി 20കാരി..

വീട്ടിലിരുന്ന് ലഹരി ഉപയോഗിച്ച ശേഷം അച്ഛനും സഹോദരനും തന്നെ ശാരീരികമായി ഉപദ്രവിക്കുന്നു എന്ന വെളിപ്പെടുത്തലുമായി 20 കാരി. കോട്ടയം വൈക്കത്താണ് സംഭവം. അച്ഛൻ ലഹരി ഉപയോഗിച്ച ശേഷം അമ്മയെയും തന്നെയും ഉപദ്രവിക്കുന്നത് പതിവാണെന്നും 20 കാരി പറയുന്നു. അഞ്ചുവർഷങ്ങൾക്കു മുൻപ് അച്ഛൻ ഇത്തരത്തിൽ അമ്മയെ ഉപദ്രവിച്ചപ്പോൾ താൻ ഇടയ്ക്ക് കയറി എന്നും അന്ന് ഇരുമ്പു വടി കൊണ്ട് തലയ്ക്ക് അടിയേറ്റു എന്നും പെൺകുട്ടി വെളിപ്പെടുത്തുന്നു.

24 കാരനായ സഹോദരന് മദ്യവും മറ്റ് ലഹരിവസ്തുക്കളും വാങ്ങാൻ പണം നൽകുന്നത് അച്ഛനാണ്. അതുകൊണ്ടുതന്നെ പിതാവിന്റെ പിന്തുണയോടെയാണ് സഹോദരനും അമ്മയെയും 20 കാരിയെയും ഉപദ്രവിക്കുന്നത്. വീടിന്റെ ബാത്റൂമിന്റെ കതക് ഉൾപ്പെടെ തല്ലിത്തകർത്തതിനാൽ തനിക്ക് വസ്ത്രം മാറാനോ കുളിക്കാനോ പോലുമുള്ള സാഹചര്യമില്ലെന്ന് പെൺകുട്ടി പറയുന്നു. അമ്മയില്ലാത്തപ്പോൾ വീട്ടിലിരിക്കാൻ തനിക്ക് പേടിയാണെന്നും അച്ഛന്റേത് ലൈംഗിക ചുവയോടെയുള്ള സംസാരവും ഉപദ്രവവും ആണെന്നും പെൺകുട്ടി പറയുന്നു. പിതാവിന്റെ ഇത്തരത്തിലുള്ള പെരുമാറ്റം കൊണ്ട് പുറത്തുള്ളവർ പോലും തന്നെ അത്തരത്തിലാണ് കാണുന്നത് എന്നാണ് പെൺകുട്ടി പറയുന്നത്.