പെരിയ ഇരട്ടക്കൊലക്കേസ് വിധി പുറത്ത്….കേസിൽ പത്ത് പ്രതികള്ക്ക് ഇരട്ട ജീവപര്യന്തം…
പെരിയയില് യൂത്ത് കോണ്ഗ്രസ് പ്രവര്ത്തകരായ ശരത്ലാലിനെയും കൃപേഷിനെയും കൊലപ്പെടുത്തിയ കേസില് ശിക്ഷ വിധിച്ചു. കേസിൽ പത്ത് പ്രതികള്ക്ക് ഇരട്ട ജീവപര്യന്തം ശിക്ഷയാണ് വിധിച്ചിരിക്കുന്നത്. ഒന്ന് മുതല് എട്ട് വരെ പ്രതികള്ക്കും 10, 15 പ്രതികള്ക്കുമാണ് ഇരട്ട ജീവപര്യന്തം ശിക്ഷ വിധിച്ചത്. ഒരു ലക്ഷം രൂപ പിഴയും ചുമത്തി. എറണാകുളം സിബിഐ കോടതിയാണ് ശിക്ഷ വിധിച്ചത്. മുന് എംഎല്എയും സിപിഐഎം നേതാവുമായി കെ വി കുഞ്ഞിരാമന് അഞ്ച് വർഷം തടവും വിധിച്ചു.
ശിക്ഷയില് പരമാവധി ഇളവ് നല്കണമെന്ന് കോടതിയില് പ്രതിഭാഗം വാദിച്ചു. കുറ്റകൃത്യം അപൂര്വ്വങ്ങളില് അപൂര്വ്വമല്ലെന്നും പ്രതിഭാഗം വ്യക്തമാക്കി. പ്രതികള് സ്ഥിരം കുറ്റവാളികള് അല്ല. മാനസാന്തരത്തിന് സാധ്യതയുണ്ട്. പല സാക്ഷി മൊഴികളിലും വൈരുധ്യമുണ്ട് എന്നും പ്രതിഭാഗം കോടതിയില് വാദിച്ചു. കേസില് ഉദുമ മുന് എംഎല്എ കെ വി കുഞ്ഞിരാമന്, സിപിഐഎം ഉദുമ മുന് ഏരിയ സെക്രട്ടറി കെ മണികണ്ഠന് അടക്കം 14 പേര് കുറ്റക്കാരാണെന്ന് എറണാകുളത്തെ പ്രത്യേക സിബിഐ കോടതി കണ്ടെത്തിയിരുന്നു.
