തൃപ്പൂണിത്തുറയെ പൈതൃക നഗരമാക്കണം… മുഖ്യമന്ത്രി

കൊച്ചി: തൃപ്പൂണിത്തുറയെ പൈതൃക നഗരമാക്കി മാറ്റണമെന്ന് മുഖ്യമന്ത്രി വി.ഡി. സതീശൻ. പൈതൃക നഗരമാകുന്നതോടെ തൃപ്പൂണിത്തുറയുടെ ചരിത്രവും പൈതൃകവും സംരക്ഷിക്കപ്പെടുമെന്ന് അദ്ദേഹം പറഞ്ഞു. തൃപ്പൂണിത്തുറയ്ക്ക് രാജകീയ പാരമ്പര്യമുണ്ട്. പതിറ്റാണ്ടുകൾക്കപ്പുറവും മതസൗഹൃദത്തിന്റെ സന്ദേശം വിളിച്ചോതുന്ന നാടാണ് തൃപ്പൂണിത്തുറയെന്നും മുഖ്യമന്ത്രി പറഞ്ഞു.

ചരിത്രപരമായ ഒട്ടേറെ പ്രത്യേകതകൾ നഗരത്തിനുണ്ട്. നിരവധി കൊട്ടാരങ്ങളും പൈതൃക കെട്ടിടങ്ങളും തൃപ്പൂണിത്തുറയുടെ പ്രത്യേകതയാണ്. ഇവ രാജ്യത്തിന് മുന്നിൽ അടയാളപ്പെടുത്തേണ്ടതുണ്ടെന്നും അദ്ദേഹം പറഞ്ഞു. പാലിയത്തച്ചന്റെ ഡച്ച് പാലസ് ഇന്ന് സംരക്ഷിക്കപ്പെട്ട് മ്യൂസിയമായി പ്രവർത്തിക്കുന്നതും മുഖ്യമന്ത്രി ചൂണ്ടിക്കാട്ടി. തൃപ്പൂണിത്തുറയുടെ പൈതൃകം കാത്തുസൂക്ഷിക്കാൻ സർക്കാർ തയ്യാറാണ്. നഗരത്തെ പൈതൃക നഗരമാക്കുന്നതിനായി എല്ലാവരും ചേർന്ന് ഒരു പ്രൊപ്പോസൽ തയ്യാറാക്കണമെന്നും അദ്ദേഹം ആവശ്യപ്പെട്ടു. അത്തം നഗറായ ഗവൺമെന്റ് ബോയ്സ് സ്കൂൾ മൈതാനിയിൽ അത്താഘോഷം ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി. കലാരൂപങ്ങളും വാദ്യഘോഷങ്ങളും നിശ്ചലദൃശ്യങ്ങളും അണിനിരക്കുന്ന അത്തച്ചമയ ഘോഷയാത്രയ്ക്ക് മുഖ്യാതിഥിയായ നടൻ ജഗദീഷ് ഫ്ലാഗ് ഓഫ് ചെയ്തു.