വന്ദേമാതരം പൂർണമായി ചൊല്ലണമെന്ന നിർദേശം… പിൻവലിക്കണം…
തിരുവനന്തപുരം: സ്വാതന്ത്ര്യദിനാഘോഷങ്ങളോടനുബന്ധിച്ച് കേരളത്തിൽ വന്ദേമാതരം പൂർണമായി ആലപിക്കുന്നതിനെച്ചൊല്ലി സർക്കാർതലത്തിൽ തർക്കം. ‘ഹർ ഘർ തിരംഗ’ പരിപാടിയുടെ ഭാഗമായി വന്ദേമാതരം പൂർണമായും ആലപിക്കണമെന്ന് ചീഫ് സെക്രട്ടറി ബിശ്വനാഥ് സിൻഹ നിർദേശം നൽകിയതോടെയാണ് വിവാദം.
‘ഹർ ഘർ തിരംഗ’യുടെ ഭാഗമായി എല്ലാ വീടുകളിലും ത്രിവർണ പതാക ഉയർത്തുന്നതിനൊപ്പം വന്ദേമാതരം പൂർണമായി ആലപിക്കണമെന്നാണ് ചീഫ് സെക്രട്ടറിയുടെ നിർദേശം. എന്നാൽ സംസ്ഥാന, ജില്ലാ തലങ്ങളിലും സർക്കാർ ഓഫീസുകളിലും ഔദ്യോഗികമായി നടക്കുന്ന സ്വാതന്ത്ര്യദിനാഘോഷ ചടങ്ങുകളുടെ പരിപാടിയിൽ വന്ദേമാതരം ഉൾപ്പെടുത്തിയിട്ടില്ല. സർക്കാർ ചടങ്ങുകൾ ക്രമീകരിക്കുന്നത് പ്രോട്ടോക്കോൾ വിഭാഗമാണ്. ചീഫ് സെക്രട്ടറിയുടെ നിർദേശം ‘ഹർ ഘർ തിരംഗ’ എന്ന പേരിൽ നടക്കുന്ന അനൗപചാരിക പ്രചാരണത്തിന് മാത്രമാണ് ബാധകമെന്നാണ് സർക്കാർ വിശദീകരണം. അതേസമയം, വന്ദേമാതരം പൂർണമായി ആലപിക്കേണ്ടതില്ലെന്ന് മന്ത്രി പി.കെ. കുഞ്ഞാലിക്കുട്ടി പ്രതികരിച്ചു. നിർദേശത്തെക്കുറിച്ച് അറിയില്ലെന്നും പരിശോധിക്കാമെന്നും മന്ത്രി രമേശ് ചെന്നിത്തല പറഞ്ഞു. നിർദേശം സംസ്ഥാന സർക്കാർ സ്വന്തമായി ഉണ്ടാക്കിയതോ പുതിയതായി കൊണ്ടുവന്നതോ അല്ലെന്ന് മന്ത്രി എൻ. ഷംസുദ്ദീൻ വ്യക്തമാക്കി. ലോക്ഭവനിൽനിന്ന് നിർദേശം നൽകാൻ പറയുമ്പോൾ ചീഫ് സെക്രട്ടറിക്ക് അത് നൽകേണ്ടിവരുമെന്നും അദ്ദേഹം പറഞ്ഞു.
വന്ദേമാതരം പൂർണമായി ആലപിക്കണമെന്ന നിർദേശത്തിനെതിരെ പ്രതിപക്ഷവും രംഗത്തെത്തി. പൂർണമായി പാടണമെന്നത് ആർഎസ്എസ് നയമാണെന്നും നിർദേശം പിൻവലിക്കണമെന്നും പ്രതിപക്ഷ നേതാവ് പിണറായി വിജയനും സിപിഎം സംസ്ഥാന സെക്രട്ടറി എം.വി. ഗോവിന്ദനും ആവശ്യപ്പെട്ടു. അതേസമയം, കേന്ദ്ര സാംസ്കാരിക മന്ത്രാലയത്തിന്റെ നിർദേശപ്രകാരമാണ് ചീഫ് സെക്രട്ടറി നടപടി സ്വീകരിച്ചതെന്നാണ് വിശദീകരണം. പരമ്പരാഗതമായി വന്ദേമാതരത്തിന്റെ ആദ്യ രണ്ട് ഖണ്ഡികകളാണ് പൊതുവെ ആലപിച്ചിരുന്നത്. എന്നാൽ ഇത്തവണ പൂർണമായി ആലപിക്കണമെന്നത് കേന്ദ്ര സർക്കാരിന്റെ തീരുമാനമാണ്. സ്വാതന്ത്ര്യദിനാഘോഷങ്ങളുടെ ഭാഗമായി വന്ദേമാതരം എത്രത്തോളം ഉൾപ്പെടുത്തണമെന്നതിനെച്ചൊല്ലിയുള്ള തർക്കം വരും ദിവസങ്ങളിൽ കൂടുതൽ രാഷ്ട്രീയ ചർച്ചകൾക്ക് വഴിവെക്കുമെന്നാണ് വിലയിരുത്തൽ.
