ഉറ്റ സുഹൃത്ത്, കാമുകൻ, പങ്കാളി, കൂട്ട്, എന്റെ പ്രിയപ്പെട്ടവൻ, ഒടുവിൽ എന്റെ ഭർത്താവും! വിവാഹ ചിത്രങ്ങൾ പങ്കുവച്ച് അഹാന

നടി അഹാന കൃഷ്ണയും പ്രശസ്ത ഛായാഗ്രാഹകൻ നിമിഷ് രവിയും വിവാഹിതരായി. സെപ്റ്റംബർ 13-ന് തിരുവനന്തപുരം താജ് കോവളത്ത് വെച്ചായിരുന്നു ഇരുവരുടെയും വിവാഹചടങ്ങുകൾ നടന്നത്.

‘എന്റെ ഉറ്റ സുഹൃത്ത്, കാമുകൻ, പങ്കാളി, ആത്മസുഹൃത്ത്, കൂട്ട്, എന്റെ പ്രിയപ്പെട്ടവൻ, ഒടുവിൽ എന്റെ ഭർത്താവും! നിന്നോടൊപ്പം എന്റെ ഹൃദയം എപ്പോഴും ശാന്തമായും താളാത്മകമായും കൃത്യമായ വേഗതയിലും സ്പന്ദിക്കുന്നു. നമുക്ക് ഒരുമിച്ച് വയസാവണം, നമുക്ക് മാത്രമായൊരു ലോകം കെട്ടിപ്പടുക്കണം… ജീവിതകാലം മുഴുവൻ, അതിനുശേഷവും ഒരേ ടീമായി മുന്നോട്ട് പോകാം’- അഹാന പോസ്റ്റിൽ കുറിച്ചു. ഈ പോസ്റ്റിന് ‘ഭാര്യ’ എന്ന കമന്റും നിമിഷ് പങ്കുവച്ചിട്ടുണ്ട്.

അഹാന കൃഷ്ണ നായികയായ ലൂക്ക എന്ന ചിത്രത്തിന്റെ ഛായാഗ്രാഹകനും നിമിഷ് രവിയായിരുന്നു. അഹാനയുടെ വീട്ടിലെ എല്ലാ സ്വകാര്യ ചടങ്ങുകളിലും നിറ സാന്നിദ്ധ്യമാണ് നിമിഷ് രവിയും കുടുംബവും. രാജീവ് രവി സംവിധാനം ചെയ്ത ‘ഞാൻ സ്റ്റീവ് ലോപസ്’ എന്ന ചിത്രത്തിലൂടെ മലയാളത്തിൽ അരങ്ങേറ്റം കുറിച്ച താരമാണ് അഹാന കൃഷ്ണ. പിന്നീട് ഞണ്ടുകളുടെ നാട്ടിൽ ഒരിടവേള,​ പതിനെട്ടാം പടി,​ അടി,​ പാച്ചുവും അത്ഭുതവിളക്കും,​ നാൻസി റാണി എന്നീ ചിത്രങ്ങളിലും അഹാന വേഷമിട്ടിട്ടുണ്ട്. ‘ലോക’ എന്ന ഹിറ്റ് ചിത്രത്തിലും അതിഥി വേഷത്തിൽ അഹാന എത്തിയിരുന്നു. ലോകയിലെ ഛായാഗ്രഹണം നിർവഹിച്ചത് നിമിഷ് രവിയാണ്. തിയേറ്ററുകളിൽ ഇപ്പോൾ ഹിറ്റായി പ്രദർശനം തുടരുന്ന നടൻ സൂര്യയുടെ ‘വിശ്വനാഥ് ആൻഡ് സൺസി’ന്റെ ഛായാഗ്രഹണം നിർവഹിച്ചിരിക്കുന്നതും നിമിഷാണ്.