കോഴിക്കോട് ബീച്ചിൽ ജീവനൊടുക്കാൻ ശ്രമിച്ച് യുവാവ്..

കുടുംബവഴക്കിനെ തുടർന്ന് നാടുവിട്ടെത്തി കടലിൽ ചാടി ജീവനൊടുക്കാൻ ശ്രമിച്ച യുവാവിനെ സമയോചിതമായ ഇടപെടലിലൂടെ രക്ഷപ്പെടുത്തി പൊലീസ് ഉദ്യോഗസ്ഥർ. കോഴിക്കോട് സൗത്ത് ബീച്ചിൽ നടന്ന സംഭവത്തിൽ എറണാകുളം സ്വദേശിയായ യുവാവിനെയാണ് പൊലീസ് ഉദ്യോഗസ്ഥർ രക്ഷിച്ചത്. തുടർന്ന് ഏറെ നേരം യുവാവുമായി സംസാരിച്ച് മാനസികമായി പിന്തുണ നൽകിയ പൊലീസ്, തുടർന്ന് നാട്ടിലേക്ക് ട്രെയിനിൽ മടക്കി അയക്കുകയും ചെയ്തു.

കോഴിക്കോട് സൗത്ത് ബീച്ചിൽ ഒരാൾ കടലിൽ ചാടി ജീവനൊടുക്കാൻ ശ്രമിക്കുന്നതായി കോഴിക്കോട് സിറ്റി പൊലീസ് കൺട്രോൾ റൂമിൽ വിവരം ലഭിച്ചതോടെയാണ് രക്ഷാപ്രവർത്തനത്തിന് തുടക്കമായത്. വിവരം ലഭിച്ച ഉടൻ എലത്തൂർ, ടൗൺ, കൺട്രോൾ റൂം വിഭാഗങ്ങളിലെ പൊലീസ് ഉദ്യോഗസ്ഥർ സ്ഥലത്തെത്തി. കടലിൽ ചാടിയ യുവാവിനെ കണ്ടെത്തിയ പൊലീസ് ഉദ്യോഗസ്ഥർ ആദ്യം ഇയാളുടെ സുരക്ഷ ഉറപ്പാക്കുകയും തുടർന്ന് സംസാരിച്ച് സ്ഥിതിഗതികൾ മനസ്സിലാക്കാൻ ശ്രമിക്കുകയും ചെയ്തു.

മദ്യലഹരിയിലായിരുന്ന യുവാവ് എറണാകുളം സ്വദേശിയാണെന്നും നാട്ടിൽ കുടുംബവുമായി വഴക്കിട്ടതിനെ തുടർന്ന് വീടുവിട്ട് എത്തിയതാണെന്നും പൊലീസിനോട് പറഞ്ഞു. കുടുംബപ്രശ്‌നങ്ങളിൽ മാനസികമായി തളർന്നിരുന്ന യുവാവ് നാട്ടിലേക്ക് മടങ്ങില്ലെന്നും ജീവനൊടുക്കാൻ തീരുമാനിച്ചിരിക്കുകയാണെന്നും പൊലീസ് ഉദ്യോഗസ്ഥരോട് പറഞ്ഞു. എന്നാൽ, യുവാവിന്റെ അവസ്ഥ മനസ്സിലാക്കിയ പൊലീസ് ഉദ്യോഗസ്ഥർ ഏറെ നേരം സംസാരിക്കുകയായിരുന്നു. ഇയാളെ ശാന്തനാക്കുകയും നാട്ടിലേക്ക് മടങ്ങാൻ സമ്മതിപ്പിക്കുകയും ചെയ്ത പൊലീസ് ഉദ്യോഗസ്ഥർ തുടർനടപടികളുടെ ഭാഗമായി ഇയാളെ റെയിൽവേ സ്റ്റേഷനിലെത്തിച്ച് ട്രെയിനിൽ കയറ്റി വിടുകയായിരുന്നു. വിവരം ലഭിച്ച ഉടൻ വിവിധ പൊലീസ് വിഭാഗങ്ങൾ ഏകോപിതമായി പ്രവർത്തിച്ചതും യുവാവുമായി ക്ഷമയോടെ സംസാരിച്ച് വിശ്വാസത്തിലെടുത്തതും രക്ഷാപ്രവർത്തനത്തിൽ നിർണായകമായി.