വി എം സുധീരനെതിരായ വ്യാജ പ്രചാരണം… ഫേസ്ബുക്ക് പ്രൊഫൈലിനെതിരെ….

തിരുവനന്തപുരം: ഫേസ്ബുക്കിലൂടെ തനിക്കെതിരെ കള്ളപ്രചാരണം നടത്തിയെന്ന കോൺഗ്രസ് നേതാവ് വി എം സുധീരന്റെ പരാതിയിൽ പൊലീസ് കേസെടുത്തു. ‘മുഹമ്മദ് ഖലീൽ’ എന്ന ഫേസ്ബുക്ക് ഐഡി ഉപയോഗിക്കുന്ന വ്യക്തിക്കെതിരെ തിരുവനന്തപുരം സിറ്റി സൈബർ ക്രൈം പൊലീസാണ് കേസെടുത്തത്. ഭാരതീയ ന്യായ സംഹിതയിലെ (BNS) 192, 336(3) വകുപ്പുകളും, ഇൻഫർമേഷൻ ടെക്നോളജി ആക്ട് – 2000 ലെ 66(സി), 120(ഒ) എന്നീ വകുപ്പുകളും പ്രകാരമാണ് കേസ് രജിസ്റ്റർ ചെയ്തിരിക്കുന്നത്. സംഭവത്തിൽ പൊലീസ് വിപുലമായ അന്വേഷണം ആരംഭിച്ചിട്ടുണ്ട്.

കഴിഞ്ഞ വ്യാഴാഴ്ചയായിരുന്നു ഫേസ്ബുക്കിലൂടെ വലിയ രീതിയിൽ കള്ളപ്രചാരണം നടന്നുവെന്ന് ചൂണ്ടിക്കാട്ടി വി എം സുധീരൻ ആഭ്യന്തര വകുപ്പ് മന്ത്രി രമേശ് ചെന്നിത്തലയ്ക്ക് നേരിട്ട് പരാതി നൽകിയത്. താൻ ഫേസ്ബുക്കിലോ മറ്റ് പൊതുവേദികളിലോ പറയാത്ത കാര്യങ്ങളാണ് തന്റെ പേരിൽ പ്രചരിപ്പിച്ചതെന്ന് സുധീരൻ പറയുന്നു. മുഖ്യമന്ത്രിയെക്കുറിച്ച് താൻ തെറ്റായ അഭിപ്രായം പറഞ്ഞു എന്ന രീതിയിലാണ് മുഹമ്മദ് ഖലീൽ എന്നയാളുടെ പ്രൊഫൈലിലൂടെ വാർത്ത പ്രചരിച്ചത്. സർക്കാരിന്റെ നിലനിൽപ്പിനെത്തന്നെ താൻ ചോദ്യം ചെയ്യുന്നു എന്ന രീതിയിൽ ജനങ്ങളിൽ തെറ്റിദ്ധാരണ പരത്താനാണ് ഇയാൾ ശ്രമിച്ചത്.

സമൂഹത്തിൽ വിദ്വേഷത്തിന്റെയും പ്രകോപനത്തിന്റെയും അന്തരീക്ഷം വളർത്തിയെടുക്കാനുള്ള ഹീനശ്രമമാണ് ഇതിന് പിന്നിൽ നടന്നതെന്ന് വി എം സുധീരൻ പരാതിയിൽ വ്യക്തമാക്കി. അതീവ ഗൗരവത്തോടെ ഈ വിഷയത്തിൽ അന്വേഷണം നടത്തി ഉത്തരവാദികളായവരെ ഉടൻ കണ്ടെത്തണമെന്നും അടിയന്തര നടപടി സ്വീകരിക്കണമെന്നും അദ്ദേഹം ആവശ്യപ്പെട്ടിരുന്നു.