സിജെപി സമരത്തിന് മുൻപേ കസ്റ്റഡി… ഡൽഹിയിൽ കനത്ത സുരക്ഷ

ന്യൂഡൽഹി: ഗ്യാനേഷ് കുമാറിന്റെ രാജി ആവശ്യപ്പെട്ട് സിജെപി ജന്തർ മന്തറിൽ നടത്താനിരിക്കുന്ന പ്രതിഷേധത്തിന് മുന്നോടിയായി രാജ്യതലസ്ഥാനത്ത് സുരക്ഷ ശക്തമാക്കി. സമരം തുടങ്ങുന്നതിന് മുൻപേ വിവിധ ഇടങ്ങളിൽ പ്രവർത്തകരെ പൊലീസ് കസ്റ്റഡിയിലെടുത്തു. കൂട്ടംകൂടുന്നവരെ കസ്റ്റഡിയിലെടുക്കാൻ നിർദേശം നൽകിയതായാണ് റിപ്പോർട്ട്. രാജീവ് ചൗക്ക് മെട്രോ സ്റ്റേഷന് സമീപം പത്ത് പ്രതിഷേധക്കാരെയും പൊലീസ് കസ്റ്റഡിയിലെടുത്തു.

ഡൽഹിയിൽ പ്രതിഷേധം കണക്കിലെടുത്ത് വിവിധയിടങ്ങളിൽ നിയന്ത്രണങ്ങൾ ഏർപ്പെടുത്തിയിട്ടുണ്ട്. കാൽനട യാത്രക്കാർക്കും നിയന്ത്രണം ഏർപ്പെടുത്തിയതോടെ രാവിലെ ജോലിക്ക് പോകാനിറങ്ങിയവരിൽ പലരും യാത്രാതടസ്സം നേരിട്ടു. കസ്റ്റഡിയിലെടുത്ത് പൊലീസ് വാഹനങ്ങളിൽ കൊണ്ടുപോകുന്നതിനിടയിലും പ്രവർത്തകർ പ്രതിഷേധം തുടർന്നു. സിജെപി പ്രതിഷേധത്തിന്റെ പശ്ചാത്തലത്തിൽ ഡൽഹി പൊലീസിന്റെയും കേന്ദ്രസേനയുടെയും 40,000ത്തിലധികം ഉദ്യോഗസ്ഥരെ വിന്യസിച്ചതായാണ് റിപ്പോർട്ട്. പ്രധാന റോഡുകളിൽ ബാരിക്കേഡുകൾ സ്ഥാപിച്ചതിനു പുറമേ താൽക്കാലിക മുള്ളുകമ്പികളും സ്ഥാപിച്ചുതുടങ്ങി. വാഹനഗതാഗതം നിയന്ത്രിക്കാനും പൊലീസ് നടപടികൾ സ്വീകരിച്ചു. പ്രതിഷേധത്തിന് മുന്നോടിയായി മാൻഡി ഹൗസിൽ റാപ്പിഡ് ആക്ഷൻ ഫോഴ്‌സ് (ആർഎഎഫ്) ഫ്ലാഗ് മാർച്ചും നടത്തി.

പ്രതിഷേധം തുടങ്ങുന്നതിന് മുൻപേ പ്രവർത്തകരെ കസ്റ്റഡിയിലെടുക്കുന്നതിനെ സിജെപി സ്ഥാപകൻ ദീപ്കെ വിമർശിച്ചു. രാജ്യത്തെ യുവാക്കളെ പ്രധാനമന്ത്രി നരേന്ദ്ര മോദി ഇത്രയധികം ഭയപ്പെടുന്നുണ്ടെങ്കിൽ പിന്നെ എന്തിനാണ് പ്രധാനമന്ത്രി സ്ഥാനത്ത് തുടരുന്നതെന്നായിരുന്നു അദ്ദേഹത്തിന്റെ ചോദ്യം. സമരം തുടങ്ങുംമുമ്പേ മോദി പരാജയം സമ്മതിച്ചുവെന്നും ദീപ്കെ എക്സിൽ പങ്കുവെച്ച പോസ്റ്റിൽ ആരോപിച്ചു. ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധത്തിന്റെ പശ്ചാത്തലത്തിൽ ഡൽഹിയിലെ സുരക്ഷാ നിയന്ത്രണങ്ങളും പൊലീസ് നടപടികളും രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്.