ബസിൽ മറന്നുവെച്ച ചെരുപ്പെടുക്കാൻ തിരികെവന്നു; റോഡ് മുറിച്ചുകടക്കുന്നതിനിടെ…

കൊല്ലത്ത് 9വയസ്സുകാരൻ കാറിടിച്ച് മരിച്ചു. ശൂരനാട് തെക്ക് ഇരവിച്ചിറ കിഴക്ക് ആഹിൽ ഭവനിൽ നവാസ്, അനീഷ ദമ്പതികളുടെ മകൻ ആഹിൽ മുഹമ്മദ് ആണ് മരിച്ചത്. ബുധനാഴ്ച രാത്രി 11.30ക്ക് കുട്ടി വിനോദയാത്ര കഴിഞ്ഞ് മടങ്ങിയെത്തിയതിനിടയിലാണ് അപകടം സംഭവിച്ചത്. റോഡ് മുറിച്ചുകടക്കുന്നതിനിടെ അതിവേഗത്തിലെത്തിയ കാർ ഇടിച്ചു തെറിപ്പിക്കുകയായിരുന്നു. തലക്ക് സഹിതം ഗുരുതര പരിക്കേറ്റിരുന്നു.

ശൂരനാട് തെക്ക് തെങ്ങും വിള ജുമാ മസ്ജിദിന് സമീപത്താണ് അപകടം നടന്നത്. മദ്രസ വിദ്യാർത്ഥികളുടെ വിനോദയാത്ര കഴിഞ്ഞെത്തിയതായിരുന്നു ആഹിൽ മുഹമ്മദ്. കുട്ടികൾ ബസിൽ നിന്നിറങ്ങി റോഡിന്റെ മറുവശത്തേക്ക് പോകുമ്പോൾ ബസിൽ മറന്നുവെച്ച ചെരുപ്പെടുക്കാൻ ആഹിൽ തിരികെ വന്നു. ചെരിപ്പെടുത്തശേഷം റോഡ് മുറിച്ചുകടക്കുന്നതിനിടെയാണ് അതിവേഗത്തിലെത്തിയ കാർ ഇടിച്ചു തെറിപ്പിച്ചത്.

തലയ്ക്ക് ഗുരുതരമായി പരിക്കേറ്റ ആഹിലിനെ കൊട്ടിയത്തെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ചികിത്സയിലിരിക്കെ വ്യാഴാഴ്ച വൈകിട്ട് നാലോടെ മരിച്ചു. ശൂരനാട് പിഎസ്പിടിഎം എൽപിഎസ് നാലാം ക്ലാസ് വിദ്യാർത്ഥിയാണ്. സംസ്കാരം വെള്ളിയാഴ്ച തെങ്ങുംവിള ജുമാ മസ്ജിദ് ഖബർസ്ഥാനിൽ നടക്കും. അസ്ന, അമൽ എന്നിവർ സഹോദരങ്ങളാണ്.