കോൺഗ്രസിൽ ഇപ്പോൾ ഗോൾഡ് റഷ്… സ്വർണം കിട്ടാത്തവർ തിരിച്ചുവരുന്നു… കെ.വി. തോമസ്

കൊച്ചി: ബിജെപി വിട്ട പത്മജ വേണുഗോപാലിന്റെയും പത്മിനി തോമസിന്റെയും കോൺഗ്രസിലേക്കുള്ള മടങ്ങിവരവ് ചർച്ചയാകുന്നതിനിടെ പ്രതികരണവുമായി മുൻ കോൺഗ്രസ് നേതാവ് പ്രൊഫ. കെ.വി. തോമസ്. കോൺഗ്രസിൽ ഇപ്പോൾ നടക്കുന്നത് ‘ഗോൾഡ് റഷ്’ ആണെന്ന് അദ്ദേഹം പരിഹസിച്ചു. സ്വർണം അന്വേഷിച്ച് പോകുന്ന എല്ലാവർക്കും അത് ലഭിക്കണമെന്നില്ലെന്നും സ്വർണം കിട്ടാത്തവർ തിരിച്ചുപോകുമെന്നും കെ.വി. തോമസ് പറഞ്ഞു. ബിജെപി അധികാരത്തിലെത്തിയപ്പോൾ നിരവധി പേർ അങ്ങോട്ട് പോയി. എന്നാൽ അവിടെ പ്രതീക്ഷിച്ച നേട്ടങ്ങളൊന്നുമില്ലെന്ന് മനസ്സിലായതോടെയാണ് ചിലർ തിരിച്ചുവരുന്നതെന്നും അദ്ദേഹം പറഞ്ഞു.
പത്മജ വേണുഗോപാൽ കോൺഗ്രസിലേക്ക് തിരിച്ചെത്തുന്നതിനെക്കുറിച്ചുള്ള ചോദ്യത്തിന്, ലീഡറുടെ മകളായ പത്മജയുടെ രക്തം കോൺഗ്രസിന്റേതാണെന്നായിരുന്നു കെ.വി. തോമസിന്റെ പ്രതികരണം. പത്മജയെ തിരിച്ചെടുക്കണമോ വേണ്ടയോ എന്ന കാര്യത്തിൽ കോൺഗ്രസ് നേതൃത്വം തീരുമാനമെടുക്കട്ടെയെന്നും അദ്ദേഹം പറഞ്ഞു. എ.കെ. ആന്റണിയും കൂട്ടരും നേരത്തെ പാർട്ടി വിട്ട് തിരിച്ചെത്തിയവരാണ്. കോൺഗ്രസിലേക്ക് വരുന്ന ആരെയും വേണ്ടെന്ന് പറയുന്ന ചരിത്രം പാർട്ടിക്കില്ലെന്നും കെ.വി. തോമസ് കൂട്ടിച്ചേർത്തു. അതേസമയം, താൻ കോൺഗ്രസിലേക്ക് തിരിച്ചുപോകില്ലെന്ന നിലപാടും അദ്ദേഹം ആവർത്തിച്ചു. 2022ൽ കോൺഗ്രസ് തന്നെ ചവിട്ടി പുറത്താക്കിയതാണ്. ആ പ്രതിസന്ധി ഘട്ടത്തിൽ തന്നെ ചേർത്തുപിടിച്ചത് സിപിഐഎം ആണ്. അതുകൊണ്ടുതന്നെ സിപിഐഎം വിട്ടുപോകുന്ന പ്രശ്നമില്ലെന്നും കെ.വി. തോമസ് വ്യക്തമാക്കി. പത്മജ വേണുഗോപാലിന്റെയും പത്മിനി തോമസിന്റെയും മടങ്ങിവരവുമായി ബന്ധപ്പെട്ട ചർച്ചകൾ കോൺഗ്രസിൽ സജീവമാകുന്നതിനിടെയാണ് കെ.വി. തോമസിന്റെ പ്രതികരണം.



