മലമൂത്ര വിസർജനം നടത്തിയതിന് അങ്കണവാടിയിലെ കുട്ടിയെ അധ്യാപിക മർദിച്ചു

മലമൂത്ര വിസർജനം നടത്തിയതിന് അങ്കണവാടിയിലെ കുട്ടിയെ അധ്യാപിക മർദിച്ചു. കോഴിക്കോട് കൊയിലാണ്ടി പുതുക്കുടി അങ്കണവാടി അധ്യാപിക രേഷ്മയ്‌ക്കെതിരെയാണ് കുട്ടിയുടെ ബന്ധുക്കൾ പോലീസിലും ചൈൽഡ് ലൈനിലും പരാതി നൽകിയത്. പരാതിക്ക് പിന്നാലെ ഐസിഡിഎസ് രേഷ്മയെ അന്വേഷണവിധേയമായി സസ്‌പെൻഡ് ചെയ്തു. വ്യാഴാഴ്ച അങ്കണവാടിയിൽ വെച്ച് കുട്ടി മലമൂത്രവിസർജനം നടത്തിയതിനെ തുടർന്നാണ് അധ്യാപിക കുട്ടിയെ മർദ്ദിച്ചതെന്നാണ് വീട്ടുകാർ പറയുന്നത്. വൈകിട്ട് കുളിപ്പിക്കുന്ന സമയത്ത് കുട്ടിയുടെ കാലിൽ പാടുകൾ കണ്ട് അന്വേഷിച്ചപ്പോഴാണ് മർദനവിവരം അറിയുന്നത്. തുടർന്ന് കുട്ടിയെ കൊയിലാണ്ടിയിലെ ആശുപത്രിയിൽ കാണിച്ചപ്പോൾ ഡോക്ടർമാർ പരാതി നൽകാൻ നിർദേശിക്കുകയായിരുന്നു. സംഭവത്തിൽ ഐസിബിഎസ് അധ്യാപികയെ അന്വേഷണവിധേയമായി സസ്പെൻഡ് ചെയ്തിട്ടുണ്ട്. പോലീസും വിഷയത്തിൽ അന്വേഷണം ആരംഭിച്ചു.