കെഎസ്ആർടിസി പെൻഷൻ വർധിപ്പിക്കില്ല… സാമ്പത്തിക പ്രതിസന്ധി ചൂണ്ടിക്കാട്ടി സർക്കാർ

തിരുവനന്തപുരം: കെഎസ്ആർടിസി പെൻഷൻ തുക വർധിപ്പിക്കില്ലെന്ന് സംസ്ഥാന സർക്കാർ. സാമ്പത്തിക പ്രതിസന്ധി രൂക്ഷമായ സാഹചര്യത്തിൽ പെൻഷൻ പരിഷ്കരിക്കുന്നത് കെഎസ്ആർടിസിക്ക് വലിയ ബാധ്യതയാകുമെന്ന് മന്ത്രി സി.പി. ജോൺ വ്യക്തമാക്കി. സ്ഥാപനത്തിന്റെ സാമ്പത്തികനില മെച്ചപ്പെടുന്ന മുറയ്ക്ക് പെൻഷൻ വർധിപ്പിക്കുന്ന കാര്യം പരിഗണിക്കുമെന്നും മന്ത്രി പറഞ്ഞു. നിലവിലെ സാഹചര്യം എല്ലാവരും മനസിലാക്കണം. പെൻഷൻ വർധിപ്പിക്കില്ലെന്നത് സർക്കാരിന്റെ വാശിയല്ല, സാമ്പത്തിക പ്രതിസന്ധി മൂലമുള്ള തീരുമാനമാണെന്നും മന്ത്രി വിശദീകരിച്ചു.

കെഎസ്ആർടിസിക്ക് നിലവിൽ 995 കോടി രൂപയുടെ ബാധ്യതയുണ്ട്. ഇത് കഴിഞ്ഞ നാലുമാസം കൊണ്ട് ഉണ്ടായതല്ലെന്നും അദ്ദേഹം ചൂണ്ടിക്കാട്ടി. ശമ്പളം അധികം നൽകുന്നതിന് മറ്റ് ബുദ്ധിമുട്ടുകളില്ലെന്നും മന്ത്രി വ്യക്തമാക്കി. പെൻഷൻ പരിഷ്കരിക്കണമെന്ന ഹൈക്കോടതി നിർദേശം സർക്കാർ തള്ളി. പെൻഷൻ വർധിപ്പിച്ചാൽ പ്രതിവർഷം 12 കോടി രൂപയുടെ അധിക ബാധ്യതയുണ്ടാകുമെന്നാണ് സർക്കാർ ചൂണ്ടിക്കാട്ടുന്നത്. നിലവിൽ കെഎസ്ആർടിസി വരുമാനനഷ്ടം നേരിടുകയാണെന്നും ദൈനംദിന ചെലവുകൾ പോലും പ്രതിസന്ധിയിലാണെന്നും സർക്കാർ വ്യക്തമാക്കി. പെൻഷൻ വർധിപ്പിക്കില്ലെന്ന തീരുമാനം സർക്കാർ ഉത്തരവായും പുറത്തിറക്കി. ഇതോടെ വർഷങ്ങളായി പെൻഷൻ വർധന ആവശ്യപ്പെടുന്ന കെഎസ്ആർടിസി പെൻഷൻകാരുടെ ആവശ്യം വീണ്ടും നിരസിക്കപ്പെട്ടിരിക്കുകയാണ്.