നാലുവർഷത്തിന് ശേഷം പുനഃസംഘടന… ബിജെപി ദേശീയ വൈസ് പ്രസിഡന്റ് സ്ഥാനത്തുനിന്ന് അബ്ദുള്ളക്കുട്ടിയെ….

കണ്ണൂർ: നാലുവർഷത്തിന് ശേഷം നടന്ന ബിജെപി പുനഃസംഘടനയിൽ എ.പി. അബ്ദുള്ളക്കുട്ടിയെ ദേശീയ വൈസ് പ്രസിഡന്റ് സ്ഥാനത്തുനിന്ന് മാറ്റി. ഇതോടെ ബിജെപി ദേശീയ നേതൃത്വത്തിലെ പ്രധാന പദവിയിലുണ്ടായിരുന്ന അബ്ദുള്ളക്കുട്ടിക്ക് സ്ഥാനനഷ്ടമായി. മോദി പ്രശംസയുടെ പേരിൽ സി.പി.എമ്മിൽ നിന്നും പിന്നീട് കോൺഗ്രസിൽ നിന്നും പുറത്താക്കപ്പെട്ടതിന് പിന്നാലെയാണ് അബ്ദുള്ളക്കുട്ടി ബിജെപിയിലെത്തിയത്. ബിജെപി അദ്ദേഹത്തെ സംസ്ഥാന ഉപാധ്യക്ഷനാക്കിയതിന് പിന്നാലെ ദേശീയ വൈസ് പ്രസിഡന്റ് സ്ഥാനത്തേക്കും ഉയർത്തുകയായിരുന്നു.

ദേശീയ വൈസ് പ്രസിഡന്റ് പദവി അബ്ദുള്ളക്കുട്ടി പോലും പ്രതീക്ഷിച്ചിരുന്നില്ലെന്ന് അദ്ദേഹം നേരത്തെ വ്യക്തമാക്കിയിരുന്നു. സി.പി.എമ്മിലോ കോൺഗ്രസിലോ ആയിരുന്നെങ്കിൽ ഇത്തരമൊരു പദവി ലഭിക്കുമായിരുന്നില്ലെന്നും അദ്ദേഹം പറഞ്ഞിരുന്നു. ന്യൂനപക്ഷങ്ങളെ ബിജെപിയിലേക്ക് അടുപ്പിക്കുക എന്ന ദൗത്യമായിരുന്നു പാർട്ടി അബ്ദുള്ളക്കുട്ടിയെ ഏൽപ്പിച്ചിരുന്നത്. എന്നാൽ മുസ്ലിം സമുദായത്തിൽനിന്ന് പ്രതീക്ഷിച്ച രീതിയിൽ ആളുകളെ പാർട്ടിയിലേക്ക് എത്തിക്കാൻ കഴിഞ്ഞില്ലെന്ന വിലയിരുത്തൽ സംസ്ഥാന നേതൃത്വത്തിനുണ്ടായിരുന്നു. കേരളത്തിലെ ന്യൂനപക്ഷങ്ങൾക്കിടയിൽ ബിജെപിയെക്കുറിച്ചുള്ള തെറ്റിദ്ധാരണകൾ മാറ്റുന്നതിലും അബ്ദുള്ളക്കുട്ടിയുടെ ഇടപെടൽ കാര്യമായ ഫലം കണ്ടില്ലെന്ന വിലയിരുത്തലുമുണ്ട്. ദേശീയ വൈസ് പ്രസിഡന്റ് പദവിയിലൂടെ രാജ്യത്തെ ബിജെപിയുടെ മുൻനിര നേതാക്കളിൽ ഒരാളായി അബ്ദുള്ളക്കുട്ടി മാറിയിരുന്നു. കേന്ദ്ര ഹജ്ജ് കമ്മിറ്റി ചെയർമാൻ സ്ഥാനവും അദ്ദേഹത്തെ തേടിയെത്തി. സി.പി.എമ്മിന്റെ എംപിയും കോൺഗ്രസിന്റെ എംഎൽഎയുമായിരുന്ന അബ്ദുള്ളക്കുട്ടി ബിജെപിയുടെ പ്രധാന മുസ്ലിം മുഖമായാണ് അറിയപ്പെട്ടിരുന്നത്.

സി.പി.എമ്മിലൂടെയാണ് അബ്ദുള്ളക്കുട്ടി രാഷ്ട്രീയ ജീവിതം ആരംഭിച്ചത്. 1999ലും 2004ലും കണ്ണൂർ ലോക്സഭാ മണ്ഡലത്തിൽ നിന്ന് വിജയിച്ചു. 2009ൽ നരേന്ദ്ര മോദിയുടെ ഗുജറാത്ത് വികസന മാതൃകയെ പ്രശംസിച്ചതിനെ തുടർന്ന് സി.പി.എം പുറത്താക്കി. അതേ വർഷം കോൺഗ്രസിൽ ചേർന്ന അദ്ദേഹം കണ്ണൂർ നിയമസഭാ ഉപതിരഞ്ഞെടുപ്പിൽ വിജയിച്ചു. 2011ലും വിജയിച്ചെങ്കിലും 2016ൽ തലശ്ശേരിയിൽ നിന്ന് പരാജയപ്പെട്ടു. തുടർന്ന് കോൺഗ്രസിലെ രാഷ്ട്രീയ ഭാവി അനിശ്ചിതമായതോടെയാണ് 2019ൽ ബിജെപിയിൽ ചേർന്നത്. പാർട്ടിയിൽ അതിവേഗം ദേശീയ നേതൃത്വത്തിലേക്ക് ഉയർന്ന അബ്ദുള്ളക്കുട്ടിക്ക് ഇപ്പോൾ പുനഃസംഘടനയിൽ ദേശീയ വൈസ് പ്രസിഡന്റ് സ്ഥാനം നഷ്ടമായിരിക്കുകയാണ്.