‘125 ദിവസം തൊഴിൽ’ പ്രഖ്യാപനം… പുതിയ തൊഴിലുറപ്പ് പദ്ധതിക്ക് ആദ്യ മാസം തന്നെ…
മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് പകരമായി കേന്ദ്ര സർക്കാർ ആരംഭിച്ച പുതിയ ഗ്രാമീണ തൊഴിലുറപ്പ് പദ്ധതിയിൽ ആദ്യ മാസം തന്നെ തൊഴിൽ അവസരങ്ങളിൽ വൻ കുറവെന്ന് റിപ്പോർട്ട്. ‘വികസിത് ഭാരത്–ഗ്യാരന്റി ഫോർ റോസ്ഗാർ ആൻഡ് ജീവിക മിഷൻ’ (വി.ബി–ജി റാം ജി) നടപ്പിലാക്കിയ ആദ്യ മാസമായ ജൂലൈയിലാണ് മുൻ വർഷത്തെ സമാന കാലയളവിനെ അപേക്ഷിച്ച് തൊഴിൽ ദിനങ്ങളിൽ പകുതിയോളം കുറവുണ്ടായത്.
ഔദ്യോഗിക കണക്കുകൾ ഉദ്ധരിച്ച് ദേശീയ മാധ്യമങ്ങളാണ് ഇക്കാര്യം റിപ്പോർട്ട് ചെയ്യുന്നത്. കഴിഞ്ഞ വർഷം ജൂലൈയിൽ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിലൂടെ 15.33 കോടി തൊഴിൽ ദിനങ്ങൾ സൃഷ്ടിച്ചപ്പോൾ, ഈ വർഷം ജൂലൈയിൽ പുതിയ പദ്ധതിക്ക് കീഴിൽ ഇത് 7.67 കോടിയായി കുറഞ്ഞു. ഇതോടെ തൊഴിൽ ദിനങ്ങളിൽ 49.94 ശതമാനത്തിന്റെ കുറവാണ് രേഖപ്പെടുത്തിയിരിക്കുന്നത്. രണ്ട് പതിറ്റാണ്ടിലേറെ പഴക്കമുള്ള മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് പകരമായി ജൂലൈ ഒന്ന് മുതലാണ് കേന്ദ്ര സർക്കാർ വി.ബി–ജി റാം ജി പദ്ധതി പ്രാബല്യത്തിൽ കൊണ്ടുവന്നത്. പദ്ധതി ആരംഭിച്ച ആദ്യ മാസം തന്നെ തൊഴിൽ ദിനങ്ങളിൽ ഇത്രയും വലിയ ഇടിവുണ്ടായത് പദ്ധതിയുടെ നടത്തിപ്പിനെയും ഗ്രാമീണ മേഖലയിലെ തൊഴിൽ സൃഷ്ടിയെയും സംബന്ധിച്ച് ചോദ്യങ്ങളും ആശങ്കകളും ഉയർത്തിയിട്ടുണ്ട്. തൊഴിലുറപ്പ് പദ്ധതിയുടെ പ്രവർത്തനം വിലയിരുത്തുന്നതിനുള്ള പ്രധാന മാനദണ്ഡങ്ങളിലൊന്നാണ് സൃഷ്ടിക്കപ്പെടുന്ന തൊഴിൽ ദിനങ്ങളുടെ എണ്ണം. ഈ കണക്കിലാണ് പുതിയ പദ്ധതിയുടെ ആദ്യ മാസത്തിൽ തന്നെ വലിയ ഇടിവുണ്ടായിരിക്കുന്നത്.
മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ പരിഷ്കരിച്ച രൂപമായാണ് കേന്ദ്ര സർക്കാർ വി.ബി–ജി റാം ജി പദ്ധതിയെ അവതരിപ്പിച്ചത്. പദ്ധതിക്ക് കീഴിൽ പ്രതിവർഷം ഉറപ്പുനൽകുന്ന തൊഴിൽ ദിനങ്ങൾ 100ൽ നിന്ന് 125 ദിവസമായി ഉയർത്തുകയും തൊഴിലാളികളുടെ വേതനം വർധിപ്പിക്കുകയും ചെയ്തിരുന്നു. ഗ്രാമീണ മേഖലയിൽ കൂടുതൽ സുസ്ഥിരമായ ആസ്തികൾ സൃഷ്ടിക്കുന്നതിനും ജനങ്ങളുടെ ഉപജീവനമാർഗം മെച്ചപ്പെടുത്തുന്നതിനും കൂടുതൽ പ്രാധാന്യം നൽകുന്നതാണ് പുതിയ പദ്ധതിയുടെ രീതിയെന്നും കേന്ദ്ര സർക്കാർ വ്യക്തമാക്കിയിരുന്നു. എന്നാൽ പദ്ധതി നടപ്പിലാക്കി ആദ്യ മാസം തന്നെ തൊഴിൽ ദിനങ്ങളിൽ പകുതിയോളം കുറവുണ്ടായതായുള്ള കണക്കുകൾ പുറത്തുവന്നതോടെ പുതിയ പദ്ധതിയുടെ പ്രായോഗിക നടത്തിപ്പിനെക്കുറിച്ചും ഗ്രാമീണ മേഖലയിലെ തൊഴിൽ ലഭ്യതയെക്കുറിച്ചും ആശങ്കകൾ ശക്തമാകുകയാണ്.
