വർക്കലയിൽ പത്തൊമ്പതുകാരിയായ നവവധു കിടപ്പുമുറിയിൽ മരിച്ച നിലയിൽ…. വിവാഹം കഴിഞ്ഞ് രണ്ടുമാസം മാത്രം

തിരുവനന്തപുരം വർക്കല റാത്തിക്കലിൽ പത്തൊമ്പതുകാരിയായ നവവധുവിനെ കിടപ്പുമുറിയിൽ മരിച്ച നിലയിൽ കണ്ടെത്തി. റാത്തിക്കൽ നാസിയ മൻസിലിൽ നൗഷാദിന്റെയും സഹീറയുടെയും മകളായ, വാവ എന്നു വിളിക്കുന്ന നാസിയയാണ് മരിച്ചത്. ഇന്നലെ വൈകുന്നേരമാണ് നാസിയയെ വീട്ടിനുള്ളിൽ ആത്മഹത്യക്ക് ശ്രമിച്ച നിലയിൽ കണ്ടെത്തിയത്. ഉടൻ തന്നെ വർക്കലയിലെ സ്വകാര്യ ആശുപത്രിയിൽ എത്തിച്ചെങ്കിലും ആരോഗ്യനില അതീവ ഗുരുതരമായതിനാൽ വിദഗ്ദ്ധ ചികിത്സയ്ക്കായി തിരുവനന്തപുരത്തെ സ്വകാര്യ ആശുപത്രിയിലേക്ക് മാറ്റുകയായിരുന്നു. തുടർന്ന് ഇന്ന് പുലർച്ചെയോടെയാണ് മരണം സ്ഥിരീകരിച്ചത്.

വെറും രണ്ടുമാസം മുമ്പാണ് നാസിയയുടെ വിവാഹം കഴിഞ്ഞത്. പരവൂർ തെക്കുംഭാഗം സ്വദേശിയായ മാണിക്കഴികം വീട്ടിൽ അൻസറാണ് നാസിയയുടെ ഭർത്താവ്. വിവാഹം കഴിഞ്ഞ് കഷ്ടിച്ച് 13 ദിവസം പിന്നിട്ടപ്പോഴേക്കും അൻസറിന് ജോലിസംബന്ധമായ ആവശ്യങ്ങൾക്കായി കുവൈത്തിലേക്ക് പോകേണ്ടി വന്നിരുന്നു. വിവാഹം കഴിഞ്ഞയുടൻ തന്നെ ഭർത്താവിൽ നിന്നും ഇത്തരത്തിൽ ദൂരെ മാറി അകന്നുനിൽക്കേണ്ടി വന്നതിനെ തുടർന്ന് നാസിയയ്ക്ക് കടുത്ത മാനസിക വിഷമമുണ്ടായിരുന്നുവെന്ന് വീട്ടുകാർ അറിയിച്ചതായി പോലീസ് വ്യക്തമാക്കുന്നു. ഇതാകാം ജീവനൊടുക്കാൻ പ്രേരിപ്പിച്ചത് എന്നാണ് പ്രാഥമിക നിഗമനം.

വിവാഹം കഴിഞ്ഞ് രണ്ടുമാസം മാത്രമാണ് ആയിട്ടുള്ളത് എന്നതിനാൽ, അസ്വാഭാവിക മരണങ്ങളിലെ നിയമനടപടികളുടെ ഭാഗമായി ആർഡിഒയുടെ നേരിട്ടുള്ള സാന്നിദ്ധ്യത്തിലായിരിക്കും ഇൻക്വസ്റ്റ് നടപടികൾ പൂർത്തിയാക്കുക. തുടർന്ന് ശാസ്ത്രീയമായ പോസ്റ്റ്മോർട്ടം നടപടികൾക്കായി മൃതദേഹം തിരുവനന്തപുരം മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റും. സംഭവത്തിൽ വർക്കല പോലീസ് കേസ് രജിസ്റ്റർ ചെയ്ത് കൃത്യമായ തുടർനടപടികൾ സ്വീകരിച്ചുവരികയാണ്.