ലോകകപ്പ് കാണുന്നതിനിടെ വൈദ്യുതി നിലച്ചു….ഒടുവിൽ കെഎസ്ഇബി ഓഫീസില് എത്തി….
എറണാകുളം: ലോകകപ്പ് ഫുട്ബോള് മത്സരത്തിനിടെ വൈദ്യുതി നിലച്ചതില് കെഎസ്ഇബിയില് എത്തി വേറിട്ട പ്രിതിഷേധവുമായി യുവാക്കള്. പോര്ച്ചുഗല് -കോംഗോ മത്സരത്തിനിടെ വൈദ്യുതി മുടങ്ങിയതിനാല് കെഎസ്ഇബി ഓഫീസില് എത്തി മത്സരം കണ്ടാണ് യുവാക്കള് പ്രതിഷേധിച്ചത്. ഇന്നലെ രാത്രി കാഞ്ഞൂര് പുതിയേടം കെഎസ്ഇബി ഓഫീസിലായിരുന്നു യുവാക്കളുടെ വേറിട്ട പ്രതിഷേധം.
വീണ്ടും വൈദ്യുതി മുടങ്ങിയാല് സമാന പ്രതിഷേധം തുടരുമെന്ന് യുവാക്കള് പറഞ്ഞു. സംസ്ഥാനത്ത് വൈകിട്ട് 6 മുതല് 12 മണിക്കിടയില് വിവിധ സമയങ്ങളിലായി വൈദ്യുതി മുടങ്ങുമെന്ന് കെഎസ്ഇബി അറിയിച്ചിരുന്നു.വൈദ്യൂതി ലഭ്യതയില് വന് കുറവ് വന്നതിനാലാണ് ഈ മാസം 30 വരെ വൈദ്യുതി നിയന്ത്രണം ഏര്പ്പെടുത്തിയിരിക്കുന്നത്. വൈദ്യുതി ലഭ്യതയില് 900 മെഗാവാട്ടിന്റെ കുറവുണ്ടെന്ന് ചൂണ്ടിക്കാട്ടിയാണ് വൈദ്യുതി നിയന്ത്രണമെന്ന് കെഎസ്ഇബി പറഞ്ഞിരുന്നു.
