ഒമാനിൽ മരിച്ച മലയാളി യുവാവിന്റെ ആത്മഹത്യാക്കുറിപ്പ് നോവാകുന്നു

ഒമാനിൽ മലയാളി പ്രവാസി യുവാവ് മരിച്ച നിലയിൽ കണ്ടെത്തിയ സംഭവത്തിൽ, അദ്ദേഹത്തിന്റെ പോക്കറ്റിൽ നിന്നും ലഭിച്ച ഹൃദയഭേദകമായ ആത്മഹത്യാക്കുറിപ്പ് പ്രവാസലോകത്തെ കണ്ണീരിലാഴ്ത്തുന്നു. കാസർകോട് പനത്തടി ചാമുണ്ഡിക്കുന്ന് പുളിക്കടവ് സ്വദേശി ഹരീഷ് കുമാർ (36) ആണ് ഒമാനിലെ ജലാൻ ബാനി ബൂ അലിയിൽ മരിച്ചത്.

“അമ്മേ…. ബോഡി നാട്ടിൽ കൊണ്ടുപോവേണ്ട… ഇവിടെ കോളേജിൽ പഠിക്കാൻ കൊടുത്തേര്…”

തന്റെ മരണശേഷം മൃതദേഹം എന്തുചെയ്യണമെന്ന് സ്വന്തം കൈപ്പടയിൽ എഴുതിവെച്ച ഹരീഷിന്റെ അവസാന വരികൾ പ്രവാസികൾക്കിടയിൽ വലിയ ചർച്ചകൾക്കും നൊമ്പരത്തിനും കാരണമായിരിക്കുകയാണ്. ജലാൻ ബാനി ബൂ അലിയിലെ ഒരു കടയിൽ സെയിൽസ്മാനായി ജോലി ചെയ്തുവരികയായിരുന്നു ഹരീഷ്.

‘നെഞ്ച് പിളർക്കുന്ന അനുഭവം’; സാമൂഹിക പ്രവർത്തകൻ
വർഷങ്ങളായി ഒമാനിൽ പ്രവാസികളുടെ മരണാനന്തര നടപടികൾക്ക് നേതൃത്വം നൽകുന്ന മസ്‌കത്ത് കെ.എം.സി.സി നാഷണൽ കമ്മിറ്റി വൈസ് പ്രസിഡന്റും കെയർ വിങ് ചെയർമാനുമായ ഇബ്രാഹിം ഒറ്റപ്പാലത്തിന്റെ ഫേസ്ബുക്ക് കുറിപ്പിലൂടെയാണ് ഈ വിവരം പുറംലോകം അറിഞ്ഞത്. നൂറുകണക്കിന് മരണങ്ങൾ കൈകാര്യം ചെയ്തിട്ടുണ്ടെങ്കിലും ഈയൊരു അനുഭവം തന്റെ നെഞ്ച് പിളർക്കുന്നതായിരുന്നുവെന്ന് അദ്ദേഹം കുറിച്ചു.

ഇന്ന് പുലർച്ചെ ഹരീഷിന്റെ സ്‌പോൺസറായ സ്വദേശി പൗരനാണ് മരണവിവരം ഇബ്രാഹിം ഒറ്റപ്പാലത്തെ വിളിച്ച് അറിയിക്കുന്നത്. തുടർന്ന് മരണാനന്തര ചടങ്ങുകൾക്കുള്ള പേപ്പർ വർക്കുകൾ തയ്യാറാക്കുന്നതിനിടയിലാണ് ഹരീഷിന്റെ പോക്കറ്റിൽ നിന്നും ലഭിച്ച ആത്മഹത്യാക്കുറിപ്പിന്റെ ചിത്രം സ്‌പോൺസർ ഇബ്രാഹിമിന് വാട്സ്‌ആപ്പിൽ അയച്ചുനൽകിയത്.

പ്രവാസം നൽകുന്ന ഏകാന്തതയും അരക്ഷിതാവസ്ഥയും
മരിക്കാൻ പോകുന്ന അവസാന നിമിഷത്തിലും തന്റെ ശരീരം മറ്റുള്ളവർക്ക് ഉപകാരപ്പെടണമെന്ന് ചിന്തിച്ച യുവാവിന്റെ സങ്കടത്തിന്റെ ആഴം എത്രത്തോളമായിരിക്കുമെന്ന് ഇബ്രാഹിം ഒറ്റപ്പാലം ഓർക്കുന്നു. പ്രവാസം എന്നാൽ വെറും പണമുണ്ടാക്കൽ മാത്രമല്ലെന്നും, ചിലരുടെയെങ്കിലും ഉള്ളിൽ തിളച്ചുമറിയുന്ന വലിയൊരു ഏകാന്തതയുടെയും നിസ്സഹായാവസ്ഥയുടെയും നരകമാണെന്നും ഈ സംഭവം വീണ്ടും ഓർമ്മിപ്പിക്കുന്നതായി അദ്ദേഹം ഫേസ്ബുക്കിൽ കുറിച്ചു.

മരിച്ച ഹരീഷ് കുമാർ മോഹനൻ-ജയ്ശ്രീ ദമ്പതികളുടെ മകനാണ്. നിലവിൽ കെ.എം.സി.സി കെയർ വിങ്ങിന്റെ നേതൃത്വത്തിൽ ഹരീഷിന്റെ മരണാനന്തര നടപടികൾ ഒമാനിൽ പുരോഗമിക്കുകയാണ്.