മാള പോലീസ് സ്റ്റേഷൻ എസ്എച്ച്ഓ ആർ. രാജേഷിനെ ക്വാർട്ടേഴ്സിൽ മരിച്ച നിലയിൽ കണ്ടെത്തി
തൃശൂർ: മാള പോലീസ് സ്റ്റേഷനിലെ എസ്എച്ച്ഓ ആർ. രാജേഷിനെ (45) താമസസ്ഥലത്ത് മരിച്ച നിലയിൽ കണ്ടെത്തി. ക്വാർട്ടേഴ്സിൽ തൂങ്ങിമരിച്ച നിലയിലാണ് അദ്ദേഹത്തിന്റെ മൃതദേഹം കണ്ടെത്തിയത്. പ്രാഥമിക വിവരങ്ങളുടെ അടിസ്ഥാനത്തിൽ ആത്മഹത്യയാണെന്നാണ് പോലീസിന്റെ നിഗമനം. കൊല്ലം ശൂരനാട് സ്വദേശിയാണ് മരിച്ച രാജേഷ്. അദ്ദേഹത്തിന്റെ ഭാര്യയ്ക്ക് കഴിഞ്ഞ ദിവസം വാഹനാപകടത്തിൽ പരിക്കേറ്റിരുന്നു. ഇതിനെ തുടർന്ന് രണ്ട് ദിവസത്തെ അവധിയിലായിരുന്ന രാജേഷ് വ്യാഴാഴ്ച ജോലിയിൽ തിരികെ പ്രവേശിക്കേണ്ടതായിരുന്നു. അതിനിടയിലാണ് ദാരുണമായ സംഭവം പുറത്തറിയുന്നത്. സംഭവത്തിൽ പോലീസ് അസ്വാഭാവിക മരണത്തിന് കേസെടുത്ത് തുടർനടപടികൾ ആരംഭിച്ചിട്ടുണ്ട്. മരണത്തിലേക്ക് നയിച്ച കൃത്യമായ കാരണം എന്താണെന്ന് കണ്ടെത്താൻ വിശദമായ അന്വേഷണം നടത്തുമെന്ന് അധികൃതർ അറിയിച്ചു.
(ജീവിതത്തിലെ വിഷമസന്ധികള്ക്ക് ആത്മഹത്യയല്ല പരിഹാരം. സമ്മര്ദ്ദങ്ങള് അതിജീവിക്കാന് സാധിച്ചേക്കില്ലെന്ന ആശങ്കയുണ്ടാകുമ്പോള് മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന് ശ്രമിക്കുക. 1056 എന്ന നമ്പറില് വിളിക്കൂ, ആശങ്കകള് പങ്കുവെയ്ക്കൂ)
