മദ്യലഹരിയിൽ ക്രൂരത…. 15-കാരനായ മകനെ വടികൊണ്ടും കസേരകൊണ്ടും തല്ലിച്ചതച്ച പിതാവ്

ഇടുക്കി: സ്വന്തം മകനെ മദ്യലഹരിയിൽ ക്രൂരമായി മർദ്ദിച്ച സംഭവത്തിൽ ഉടുമ്പന്നൂർ സ്വദേശിയായ പിതാവ് പിടിയിൽ. ഉടുമ്പന്നൂർ സ്വദേശി നജീബിനെയാണ് പോലീസ് അറസ്റ്റ് ചെയ്തത്. നജീബിന്റെ മർദ്ദനമേറ്റ് പതിനഞ്ചുകാരനായ മകന് പരിക്കേറ്റു.

ഇന്നലെ രാത്രിയാണ് നാടിനെ നടുക്കിയ സംഭവം നടന്നത്. മദ്യപിച്ചെത്തിയ നജീബ് യാതൊരു പ്രകോപനവുമില്ലാതെ മകനെ ക്രൂരമായി ഉപദ്രവിക്കുകയായിരുന്നു. വീട്ടിലുണ്ടായിരുന്ന വടിയും കസേരയും ഉപയോഗിച്ചാണ് തന്നെ തല്ലിയതെന്ന് മകന്റെ മൊഴിയിൽ പറയുന്നു. പരിക്കേറ്റ കുട്ടിയെ ഉടൻ തന്നെ ആശുപത്രിയിൽ പ്രവേശിപ്പിച്ചു. കുട്ടിയുടെ മൊഴിയുടെ അടിസ്ഥാനത്തിൽ പോലീസ് ഉടൻ തന്നെ നജീബിനെ കസ്റ്റഡിയിലെടുത്തു. പ്രതിക്കെതിരെ ബാലനീതി നിയമപ്രകാരമുള്ള ജാമ്യമില്ലാ വകുപ്പുകൾ ഉൾപ്പെടെ ചുമത്തിയാണ് കേസെടുത്തിരിക്കുന്നത്.

സംഭവത്തിൽ ചൈൽഡ് ലൈൻ അധികൃതരും ഇടപെട്ടിട്ടുണ്ട്. കുട്ടിയുടെ സുരക്ഷ ഉറപ്പാക്കാനുള്ള നടപടികൾ സ്വീകരിച്ചതായും പ്രതിയെ ഉടൻ കോടതിയിൽ ഹാജരാക്കുമെന്നും പോലീസ് അറിയിച്ചു.