വ്യാജ കേസ് മുതൽ കോടികളുടെ തട്ടിപ്പ് വരെ…. അജി കൃഷ്ണനെതിരെ പുതിയ ആരോപണങ്ങൾ

തിരുവനന്തപുരം: എച്ച്ആർഡിഎസിനെതിരെ ഗുരുതര ആരോപണങ്ങളുമായി ജീവനക്കാരൻ രംഗത്ത്. സ്ഥാപക സെക്രട്ടറി അജി കൃഷ്ണൻ പോക്‌സോ കേസ് ഒതുക്കാൻ പണമൊഴുക്കിയെന്നാണ് പുതിയ വെളിപ്പെടുത്തൽ. അജി കൃഷ്ണനെതിരെ നിയമനടപടി ആവശ്യപ്പെട്ട് കോടതിയെ സമീപിക്കുമെന്നും ജീവനക്കാരൻ അറിയിച്ചു.അതേസമയം, മുൻ കേന്ദ്രമന്ത്രി ഡോ. എസ് കൃഷ്ണകുമാർക്കെതിരായ വ്യാജ പീഡനപരാതിക്ക് പിന്നിലും അജി കൃഷ്ണനാണെന്നാണ് ആരോപണം. പ്രായപൂർത്തിയാകാത്ത മകളെ അജി കൃഷ്ണൻ പീഡിപ്പിച്ചെന്ന പരാതി നൽകിയ ജീവനക്കാരനാണ് വീണ്ടും ആരോപണങ്ങളുമായി രംഗത്തെത്തിയിരിക്കുന്നത്.എച്ച്ആർഡിഎസിലെ ജീവനക്കാരിയെ ഉപദ്രവിച്ചതായും, കോൺട്രാക്ടർമാരെ തെറ്റിദ്ധരിപ്പിച്ച് കോടികൾ സ്ഥാപനം കൈക്കലാക്കിയതായും ആരോപണമുണ്ട്. കൂടാതെ, പ്രധാനമന്ത്രിയുടെ ചിത്രം പതിച്ച കലണ്ടറും ഡയറിയും അച്ചടിക്കാൻ 25 ലക്ഷം രൂപ ചെലവഴിച്ചതായും, ആളുകളെ തെറ്റിദ്ധരിപ്പിക്കാൻ ഇതുപയോഗിച്ചതായും ജീവനക്കാരൻ ആരോപിക്കുന്നു.പ്രായപൂർത്തിയാകാത്ത കുട്ടിക്കെതിരായ ലൈംഗികാതിക്രമവുമായി ബന്ധപ്പെട്ട കേസിൽ 2024-ലാണ് സംഭവം നടന്നതെന്നാണ് പരാതി. ജോലി ആവശ്യത്തിന് കൊൽക്കത്തയിലായിരുന്ന സമയത്ത് വീട്ടിൽ വെച്ച് മകളെ അജി കൃഷ്ണൻ പീഡിപ്പിച്ചുവെന്നാണ് പരാതിക്കാരന്റെ മൊഴി.ഈ മാസം ഏഴിന് സ്കൂളിൽ നടത്തിയ കൗൺസിലിംഗിനിടെയാണ് കുട്ടി സംഭവം വെളിപ്പെടുത്തിയതെന്ന് അറിയുന്നു. ശിശു സംരക്ഷണ വകുപ്പിന്റെ നിർദേശത്തെ തുടർന്നാണ് പരാതി നൽകിയതെന്നും റിപ്പോർട്ടുണ്ട്.പോക്സോ നിയമപ്രകാരവും ബിഎൻഎസ് 73 വകുപ്പുപ്രകാരവും എഫ്‌ഐആർ രജിസ്റ്റർ ചെയ്തിട്ടുണ്ട്. എന്നാൽ ഇതുവരെ ആരുടെയും പേര് രേഖപ്പെടുത്തിയിട്ടില്ല. കൂടുതൽ അന്വേഷണത്തിന് ശേഷമേ അറസ്റ്റ് ഉണ്ടാകൂവെന്നാണ് പൊലീസിന്റെ വിശദീകരണം.സംഭവത്തിൽ എച്ച്ആർഡിഎസ് മുൻപ് ആരോപണങ്ങൾ നിഷേധിച്ച്, സ്ഥാപനത്തിനുള്ളിലെ തർക്കമാണ് പരാതിക്ക് പിന്നിലെന്നായിരുന്നു പ്രതികരണം.