തൊഴുത്തിൽ പശുവിനെ കറക്കുന്നതിന് ഇടയിൽ സമീപത്ത് വന്ന് വീണത്… 43കാരൻ അറസ്റ്റിൽ

പശു ഫാം നടത്തുന്നയാളെ ഗുണ്ട് എറിഞ്ഞ് ആക്രമിച്ച കേസിൽ പ്രതി അറസ്റ്റിൽ. വധശ്രമം അടക്കം നിരവധി ക്രമിനൽക്കേസിലെ പ്രതിയാണ് അറസ്റ്റിലായത്. അഴീക്കോട് സീതി സാഹിബ് ഈസ്റ്റ് സ്വദേശി ഹസനുൽ ബന്ന (43) ആണ് അറസ്റ്റിലായത്. അഴീക്കോട് സീതി സാഹിബ് ഈസ്റ്റ് സ്വദേശി തയ്യിൽ വീട്ടിൽ ബൈജുവിനെ അപായപ്പെടുത്താനായി ഗുണ്ട് കത്തിച്ച് എറിഞ്ഞ സംഭവത്തിനാണ് അറസ്റ്റ്. വെള്ളിയാഴ്ച്ച രാവിലെ ആറ് മണിയോടെ ബൈജുവിന്റെ വീടിനോട് ചേർന്ന പശു ഫാമിൽ പാൽ കറക്കുന്നതിനായി വന്നപ്പോഴാണ് 43കാരൻ ഗുണ്ട് കത്തിച്ച് എറിഞ്ഞത്. ഗുണ്ട് തൊഴുത്തിൽ വീണ് പൊട്ടിത്തെറിക്കുകയായിരുന്നു. എന്നാൽ ആക്രമണത്തിൽ നിന്ന് ബൈജു അത്ഭുതകരമായി രക്ഷപ്പെടുകയായിരുന്നു. പശു ഫാം നടത്തുന്നതുമായി ബന്ധപ്പെട്ട് ഹസനുൽ ബന്നയ്ക്ക് ഉള്ള വിരോധമാണ് അപായപ്പെടുത്താൻ ശ്രമിച്ചതിന് കാരണം.

ഹസനുൽ ബന്ന കൊടുങ്ങല്ലൂർ പൊലീസ് സ്റ്റേഷനിൽ രണ്ട് വധശ്രക്കേസുകളിലും, വീടുകയറി ആക്രമണം നടത്തിയ ഒരു കേസിലും, ആയുധ നിയമപ്രകാരമുള്ള ഒരു കേസിലും, അടക്കം പതിനൊന്ന് ക്രമിനൽക്കേസുകളിൽ പ്രതിയാണ്. കൊടുങ്ങല്ലൂർ പൊലീസ് സ്റ്റേഷൻ എസ്.ഐ. കെ. സാലിം, ജി.എസ്. സി.പി.ഒമാരായ സനോജ്, ഷിജിൻ നാഥ്, അബീഷ് എന്നിവരാണ് അന്വേഷണ സംഘത്തിലുണ്ടായിരുന്നത്.