ഭക്ഷണത്തിൽ നിന്നും ഉപ്പ് ഒഴിവാക്കണം…ചാറ്റ് ജിപിടിയോട് ഉപദേശം തേടി 60 വയസുകാരൻ ആശുപത്രിയിൽ…
ഇപ്പോൾ എല്ലാവരും എന്തിനും ഏതിനും ചാറ്റ് ജിപിടിയോട് ഉപദേശം തേടുന്നത് പതിവാണ്. ആരോഗ്യം, സൗന്ദര്യം, ജോലി സംബന്ധമായ കാര്യങ്ങൾ എന്തുമാകട്ടെ ചാറ്റ് ജിടിപിയിൽ നിന്ന് അതിന് മറുപടി ഉടനെ ലഭിക്കും. അങ്ങനെ ആരോഗ്യ പരിപാലനത്തിന് ഭക്ഷണത്തിൽ നിന്നും ഉപ്പ് ഒഴിവാക്കാൻ ബെൻ എന്ന 60 വയസുകാരനാണ് ചാറ്റ് ജിടിപിയോട് ഉപദേശം തേടി ആശുപത്രിയിലായത്.
ഭക്ഷണത്തിലെ ഉപ്പാണ് ശരീരം ക്ഷീണിപ്പിക്കുന്നതെന്നും ഒഴിവാക്കുകയാണെങ്കില്‍ നല്ലതാണെന്നും കേട്ട് ഭക്ഷണത്തിലെ ഉപ്പ് ഒഴിവാക്കാൻ എന്താണ് ചെയ്യേണ്ടതെന്നായിരുന്നു 60 കാരൻ ചാറ്റ് ജിപിടിയോട് ചോദിച്ചത്. ചാറ്റ് ജിപിടി ബെന്നിന് സജസ്റ്റ് ചെയ്തത് സോഡിയം ബ്രോമൈഡ് ആണ്. സോഡിയം ബ്രോമൈഡ് 1900കളില്‍ വിവിധ മരുന്നുകളില്‍ ഉപയോഗിച്ചിരുന്നുവെങ്കിലും വന്‍തോതില്‍ വിഷാംശമുണ്ടെന്ന് കണ്ടെത്തിയതിനെ തുടര്‍ന്ന് ഒഴിവാക്കുകയായിരുന്നു. ചാറ്റ് ജിപിടിയുടെ നിർദ്ദേശം പരിഗണിച്ച ബെൻ ഓണ്‍ലൈനായി സോഡിയം ബ്രോമൈഡ് വരുത്തി. ചാറ്റ് ജിപിടി നൽകിയ ഡയറ്റ് പ്ലാൻ അനുസരിച്ച് മൂന്ന് മാസത്തോളം സോഡിയം ബ്രോമൈഡ് കഴിച്ചു.
അതുവരെ മാനസികമോ, ശാരീരികമോ ആയി മുന്‍പ് യാതൊരു പ്രശ്നങ്ങളുമില്ലാതിരുന്ന ബെന്‍ വൈകാതെ പിച്ചും പേയും പറയാനും ഇല്ലാത്ത ശബ്ദങ്ങള്‍ കേള്‍ക്കാനും അസ്വാഭാവികമായി പെരുമാറാനും തുടങ്ങി. ഇതോടെ ബന്ധുക്കൾ ഇയാളെ ആശുപ്രത്രിയിലാക്കി. അയൽവാസി തന്നെ വിഷം ഉപയോഗിച്ച് കൊല്ലാൻ ശ്രമിച്ചതാണെന്നായിരുന്നു ഇയാളുടെ ആരോപണം. പിന്നീട് പരിശോധനയിൽ ഇദ്ദേഹം സോഡിയം ബ്രോമൈഡ് ഉപയോഗിച്ചിരുന്നതായി കണ്ടെത്തി. കടുത്ത മാനസിക പ്രശ്നങ്ങൾ, ചർമ്മരോഗങ്ങൾ തുടങ്ങി പല അസുഖങ്ങളുടെ ലക്ഷണങ്ങൾ ഇയാൾ കാണിച്ചിരുന്നു. ദാഹം ഉണ്ടായിരുന്നെങ്കിലും വെള്ളം കുടിക്കാൻ ഭയം കാണിച്ചതായും റിപ്പോർട്ടിൽ പറയുന്നു.
