കനത്ത മഴ, ഇറി​ഗേഷൻ ഓഫീസിൽ വെള്ളം കയറി.. മേശപ്പുറത്ത് കയറിയിരുന്ന് ജീവനക്കാർ..

പാലക്കാട് ഷൊർണൂരിൽ കനത്ത മഴ. തുടർന്ന് ഇറി​ഗേഷൻ ഓഫീസിനകത്ത് വെള്ളം കയറി. ജീവനക്കാർ മേശ പുറത്ത് കയറി ഇരുന്നുകൊണ്ടാണ് ഓഫീസ് പ്രവർത്തനങ്ങൾ മുന്നോട്ട് കൊണ്ടുപോകുന്നത്

ഷൊർണൂരിൽ മണിക്കൂറുകളായി അതിശക്തമായ മഴയായിരുന്നു. ഇതോടെ റോഡിലും പരിസര പ്രദേശങ്ങളിലും വെള്ളം കയറിയിട്ടുണ്ട്. ഇറി​ഗേഷൻ ഓഫീസിലും വെള്ളം കയറി. ചെറിയ കുളത്തിന് അടുത്തായാണ് ഇറി​ഗേഷൻ ഓഫീസ് ഉള്ളത്. ചെറിയ മഴ പെയ്താൽ പോലും സാധാരണയായി ഈ ഓഫീസിലേക്ക് വെള്ളം കയറാറുണ്ട്. അതിശക്തമായ മഴ കൂടി പെയ്തതോടെ ഓഫീസിനുള്ളിലേക്ക് വെള്ളം ഇരച്ചുകയറിയിരിക്കുകയാണ്. രണ്ടടി പൊക്കത്തിൽ വെള്ളം കയറിയിട്ടുണ്ട്. ഈ ഒരു പ്രദേശത്ത് ഡ്രെയിനേജ് സംവിധാനം ഇല്ല. ഒരു ഡ്രെയിനേജ് സംവിധാനം സ്ഥാപിക്കണം എന്നത് ഇവിടുത്തെ ഉദ്യോ​ഗസ്ഥരുടെ ഏറെക്കാലമായുള്ള ആവശ്യമാണ്. എന്നാൽ, ഇതുവരെയും വേണ്ട നടപടികൾ ബന്ധപ്പെട്ട ഉദ്യോ​ഗസ്ഥർ എടുത്തിട്ടില്ല എന്നും ആക്ഷേപം ഉയരുന്നുണ്ട്.

ഓഫീസിനുള്ളിലേക്ക് വെള്ളം കയറിയപ്പോൾ മറ്റ് വഴികളില്ലാതെ ഉദ്യോ​ഗസ്ഥർ മേശപ്പുറത്ത് കയറിയിരുന്നുകൊണ്ടാണ് ഓഫീസിന്റെ പ്രവർത്തനം മുന്നോട്ട് കൊണ്ടുപോകുന്നത്. മെല്ലെ വെള്ളം താഴും എന്ന പ്രതീക്ഷയിലാണ് ഉദ്യോ​ഗസ്ഥർ