NTPC കേന്ദ്രീയ വിദ്യാലയം…അടച്ചുപൂട്ടൽ ഒഴിവാക്കാൻ ഉന്നതതല യോഗം ചേരാൻ സുപ്രീം കോടതി നിർദേശം…
NTPC Kendriya Vidyalaya...Supreme Court directs high level meeting to avoid closure...
കായംകുളത്തെ എൻ.ടി.പി.സി കേന്ദ്രീയ വിദ്യാലയം അടച്ചുപൂട്ടുന്നത് ഒഴിവാക്കുന്നത് സംബന്ധിച്ച് ഉന്നതതല യോഗം ചേരാൻ സുപ്രീം കോടതി നിർദേശം.കോൺഗ്രസ് നേതാവ് രമേശ് ചെന്നിത്തല നൽകിയ ഹർജിയിലാണ് സുപ്രീം കോടതിയുടെ നിർണായക ഇടപെടൽ. കേന്ദ്ര വിദ്യാഭ്യാസ സെക്രട്ടറിക്കാണ് സുപ്രീം കോടതി നിർദേശം നൽകിയത്.
എൻ.ടി.പി.സി ചെയർമാൻ, കേന്ദ്രീയ വിദ്യാലയ കമ്മിഷണർ, കേരളത്തിലെ വിദ്യാഭ്യാസ സെക്രട്ടറി, കേന്ദ്ര ഊർജ്ജ സെക്രട്ടറി എന്നിവരുടെ യോഗം വിളിച്ച് ചേർക്കാനാണ് കേന്ദ്ര വിദ്യാഭ്യാസ സെക്രട്ടറിയോട് നിർദേശിച്ചിരിക്കുന്നത്. രണ്ടാഴ്ച്ചയ്ക്കുള്ളിൽ യോഗം വിളിച്ച് ചേർക്കണമെന്നും യോഗത്തിന്റെ മിനുറ്റ്സ് നാലാഴ്ച്ചയ്ക്കകം കോടതിക്ക് കൈമാറണമെന്നും ജസ്റ്റിസുമാരായ കെ.വി. വിശ്വനാഥൻ, എൻ.കെ. സിങ് എന്നിവർ അടങ്ങിയ ബെഞ്ച് നിർദേശിച്ചു.
കായംകുളത്തെ എൻ.ടി.പി.സി. പ്രോജക്ട് അവസാനിപ്പിച്ചതോടെയാണ് കേന്ദ്രീയ വിദ്യാലയത്തിന്റെ പ്രവർത്തനം പ്രതിസന്ധിയിലായത്. നിലവിൽ 517 വിദ്യാർഥികളുള്ള സ്കൂളിൽ 18 വിദ്യാർഥികൾ മാത്രമാണ് തങ്ങളുടെ ജീവനക്കാരുടേതെന്ന് എൻ.ടി.പി.സി. സുപ്രീംകോടതിയെ അറിയിച്ചു. അതിനാൽ സ്കൂളിനെ സ്പോൺസർ ചെയ്യാൻ തങ്ങൾക്കാകില്ലെന്നും എൻ.ടി.പി.സി. കോടതിയിൽ വ്യക്തമാക്കി.
