ഹരിത കർമ്മ സേനാംഗത്തിന് ജോലിക്കിടയിൽ പാമ്പു കടിയേറ്റു…

ചെങ്ങന്നൂർ: ജോലിക്കിടയിൽ നഗരസഭ ഹരിത കർമ്മ സേനാംഗത്തിന് പാമ്പു കടിയേറ്റു. ചെങ്ങന്നൂർ തിട്ടമേൽ തോട്ടത്തിൽ പി.ജി.വത്സല (50) ക്കാണ് പാമ്പു കടിയേറ്റത്. ഉച്ചയ്ക്ക് 12:45 ഓടെ നഗരസഭയുടെ ഉടമസ്ഥയിലുള്ള പെരുങ്കുളം പാടത്ത് ഹരിതകർമ്മസേന എം.സി.എഫിൽ ശേഖരിച്ച പ്ലാസ്റ്റിക്കുകൾ വേർതിരിക്കുന്നതിനിടയിൽ ചാക്കുകൾക്കിടയിൽ ഉണ്ടായിരുന്ന പാമ്പ് വത്സലയുടെ വലതു കൈത്തണ്ടയിൽ കടിക്കുകയായിരുന്നു.ഉടൻ തന്നെ കൂടെ ഉണ്ടായിരുന്ന ഹരിത കർമ്മ സേനാംഗങ്ങൾ വത്സലയെ സമീപത്തെ ജില്ലാ ആശുപത്രിയിൽ എത്തിച്ചു. സംഭവം അറിഞ്ഞ് നഗരസഭ ചെയർപേഴ്സൺ അഡ്വ: ശോഭാ വർഗീസ്, വൈസ് ചെയർമാൻ കെ. ഷിബുരാജൻ, നഗരസഭാ സെക്രട്ടറി ടി.വി. പ്രദീപ്കുമാർ, സീനിയർ പബ്ലിക്ക് ഹെൽത്ത് ഇൻസ്പെക്ടർ സി.നിഷ തുടങ്ങിവർ ആശുപത്രിയിൽ എത്തുകയും വിദഗ്ദ്ധ ചികിത്സയ്ക്കായി നഗരസഭാ ആംബുലൻസിൽ തിരുവല്ല മെഡിക്കൽ മിഷൻ ആശുപത്രിയിലേയ്ക്ക് മാറ്റുകയും ചെയ്തു. ഡോക്ടറുടെ നിർദ്ദേശപ്രകാരം വത്സലയെ ഐ.സി.യു. യൂണിറ്റിൽ 24 മണിക്കൂർ നിരീക്ഷണത്തിലാക്കി.