വണ്ടിയിലെ ഇന്ധനം യാത്രമദ്ധ്യേ തീർന്നു…നാല് കുട്ടികളെ കനാലിൽ എറിഞ്ഞ ശേഷം യുവതി സ്വയം ജീവനൊടുക്കാൻ ശ്രമിച്ചു…

യുവതി നാല് കുട്ടികളെ കനാലിലെറിഞ്ഞ ശേഷം അതേ കനാലിൽ തന്നെ ചാടി ജീവനൊടുക്കാൻ ശ്രമിച്ചു. ഇതിൽ രണ്ട് കുട്ടികളുടെ മൃത​ദേഹം കണ്ടെത്തി. ജീവനൊടുക്കാൻ ശ്രമിച്ച യുവതിയെ മത്സ്യബന്ധന തൊഴിലാളികൾ രക്ഷപ്പെടുത്തി.കർണാടകയിലെ വിജയപുരയിലാണ് സംഭവം. നിദ​ഗുണ്ഡി താലൂക്കിലാണ് യുവതി കുട്ടികളെ കനാലിൽ എറിഞ്ഞ ശേഷം ജീവനൊടുക്കാൻ ശ്രമിച്ചത്. ഇതിൽ അഞ്ച് വയസ്സുകാരിയായ തനുശ്രീയുടെയും മൂന്ന് വയസ്സുള്ള സുരക്ഷയുടെയും മൃതദേഹം ലഭിച്ചു. ഇരട്ട കുട്ടികളായ പതിമൂന്ന് മാസം മാത്രം പ്രായമുള്ള കുഞ്ഞുങ്ങൾക്കായുള്ള തിരച്ചിൽ നടന്നു വരികയാണ്.

നിം​ഗരാജു ഭജൻത്രി എന്നയാളുടെ ഭാര്യയായ ഭാ​ഗ്യശ്രീ ഭജൻത്രി ആണ് കുട്ടികളെ കനാലിൽ എറിഞ്ഞത്. കടബാധ്യത മൂലം ഭർത്താവുമായിയുണ്ടായ വാക്ക് ത‍‍ർക്കത്തെ തുടർന്നാണ് ഇവർ കുട്ടികളെ വെള്ളത്തിലേക്ക് എറിഞ്ഞ ശേഷം ജീവനൊടുക്കാൻ ശ്രമിച്ചത്.

ഭ‌ർത്താവായ നിം​ഗരാജു ഭജൻത്രി വലിയ തുക ലോണെടുത്തിരുന്നു. ഇത് അടയ്ക്കാനായി ഇയാൾ പിതാവിനോട് സ്വത്ത് വീതിച്ച് നൽക്കാൻ ആവശ്യപ്പെട്ടിരുന്നു. ഇത് നൽക്കാതെ വന്നപ്പോൾ ഭാ​ഗ്യശ്രീയെ ഇയാൾ കുറ്റപ്പെടുത്തുകയായിരുന്നു. ഇതിന് പിന്നാലെ ഇവർ ബൈക്കിൽ കുട്ടികളെയും കൂട്ടി യാത്ര ചെയ്യവെ വണ്ടിയിലെ ഇന്ധനം കനാലിന് സമീപം വെച്ച് തീർന്നു പോവുകയായിരുന്നു. ഭാ​ഗ്യശ്രീയെയും കുട്ടികളെയും കനാലിനടുത്ത് നിർത്തിയ ശേഷം നിം​ഗരാജു ഇന്ധനം വാങ്ങാൻ പോയപ്പോഴാണ് ഭാ​ഗ്യശ്രീ നാല് കുട്ടികളെയും കനാലിൽ എറിഞ്ഞ ശേഷം ജീവനൊടുക്കാൻ ശ്രമിച്ചത്. ഇവർക്കെതിരെ പൊലീസ് കൊലകുറ്റത്തിന് കേസെടുത്തിട്ടുണ്ട്.