മഴയുടെ കുറവും ഉത്പാദനക്കുറവും പ്രതിസന്ധി രൂക്ഷമാക്കി… പരിഹാരത്തിനായി കേന്ദ്രവുമായി ചർച്ച നടത്തിയെന്ന്…
സംസ്ഥാനത്തെ വൈദ്യുതി പ്രതിസന്ധി പരിഹരിക്കാൻ സർക്കാർ മാതൃകാപരമായ ശ്രമങ്ങൾ നടത്തിവരികയാണെന്ന് വൈദ്യുതി മന്ത്രി സണ്ണി ജോസഫ് നിയമസഭയിൽ വ്യക്തമാക്കി. കഴിയാവുന്നത്ര വൈദ്യുതി ലഭ്യമാക്കാനുള്ള നടപടികൾ സ്വീകരിച്ചിട്ടുണ്ടെന്നും, കഴിഞ്ഞ ദിവസങ്ങളിൽ സംസ്ഥാനത്ത് യാതൊരുവിധ വൈദ്യുതി നിയന്ത്രണവും ഏർപ്പെടുത്തിയിട്ടില്ലെന്നും അദ്ദേഹം കൂട്ടിച്ചേർത്തു. പ്രതിസന്ധി പരിഹരിക്കുന്നതിനായി മുഖ്യമന്ത്രിയും താനും കേന്ദ്ര ഊർജ്ജ മന്ത്രാലയവുമായി ചർച്ചകൾ നടത്തിയിട്ടുണ്ടെന്നും സർക്കാർ ഇതിൽ വിജയം കാണുമെന്നും മന്ത്രി വ്യക്തമാക്കി.
മുൻ വൈദ്യുതി മന്ത്രി കെ. കൃഷ്ണൻകുട്ടി എഴുതിയ ലേഖനം പ്രതിസന്ധിയുടെ യഥാർത്ഥ കാരണങ്ങൾ വ്യക്തമാക്കുന്നുണ്ടെന്നും മന്ത്രി ചൂണ്ടിക്കാട്ടി. 4500 മെഗാവാട്ടിന്റെ കുറവാണ് പ്രതീക്ഷിച്ചിരുന്നതെന്നാണ് ആ ലേഖനത്തിൽ പറയുന്നത്. കേരളം വൈദ്യുതോല്പാദനത്തിനായി പ്രധാനമായും ജലപദ്ധതികളെയാണ് ആശ്രയിക്കുന്നത്. എന്നാൽ കഴിഞ്ഞ 10 വർഷത്തിനിടെ ജലവൈദ്യുത പദ്ധതികളിൽ ആകെ ഉണ്ടായ ഉത്പാദന വർദ്ധനവ് 150 മെഗാവാട്ട് മാത്രമാണ്. ദേശീയതലത്തിലും വൈദ്യുതി പ്രതിസന്ധി നിലനിൽക്കുന്നുണ്ട്. സംസ്ഥാനത്ത് മഴക്കുറവ് വലിയ പ്രതിസന്ധിയാണ് സൃഷ്ടിച്ചിരിക്കുന്നത്. ഇടുക്കി പദ്ധതി പ്രദേശത്ത് മാത്രം 47 ശതമാനവും, കേരളത്തിൽ ആകെ 28 ശതമാനവും മഴ കുറഞ്ഞു. ഇടുക്കിയിൽ മാത്രം 41 ശതമാനത്തിന്റെ മഴക്കുറവാണ് രേഖപ്പെടുത്തിയിട്ടുള്ളത്. വൈദ്യുതി ഉപയോഗം കൂടുകയും ഉൽപാദനം കുറയുകയും ചെയ്യുന്ന സാഹചര്യമാണ് നിലവിലുള്ളത്.
കഴിഞ്ഞ വർഷം കേരളം സ്വയം ഉത്പാദിപ്പിച്ചത് 15 ശതമാനത്തിൽ താഴെ വൈദ്യുതി മാത്രമാണ്. ഭൂതത്താൻകെട്ട് പദ്ധതി പത്തുവർഷമായിട്ടും പൂർത്തിയായിട്ടില്ലെന്നും മണിയാർ പ്രവർത്തനക്ഷമമല്ലെന്നും മൂഴിയാർ പദ്ധതിക്കായി ചൈനീസ് കമ്പനിക്ക് കരാർ നൽകിയിട്ടും ഉൽപ്പാദനം 10 ശതമാനം മാത്രമാണ് കൂടിയതെന്നും മന്ത്രി വിമർശിച്ചു. മുൻ സർക്കാരിന്റെ കാലത്ത് പലതവണ കെഎസ്ഇബി കത്തുകൾ നൽകിയിട്ടും ദീർഘകാല കരാറുകൾ റദ്ദാക്കുകയാണുണ്ടായത്. എൽഡിഎഫ് സർക്കാരുണ്ടാക്കിയ കടബാധ്യതയാണ് ഇപ്പോൾ യുഡിഎഫിന്റെ തലയിലായിരിക്കുന്നത്. എങ്കിലും എല്ലാ പ്രതിസന്ധികളും പരിഹരിച്ച് മുന്നോട്ടു പോകാനുള്ള പരിശ്രമത്തിലാണ് സർക്കാരെന്നും മന്ത്രി സഭയിൽ അറിയിച്ചു.
