വീര്യം കുറഞ്ഞ മദ്യ വിവാദം… നീക്കത്തിന് തുടക്കമിട്ടത് വി.എസ് സർക്കാർ… 18 വർഷം പഴക്കമുള്ള നിർണ്ണായക രേഖകൾ പുറത്ത്
തിരുവനന്തപുരം: സംസ്ഥാനത്ത് വീര്യം കുറഞ്ഞ മദ്യത്തിന് നികുതി ഇളവ് നൽകാനുള്ള ബജറ്റ് പ്രഖ്യാപനത്തെച്ചൊല്ലി ഭരണ-പ്രതിപക്ഷ പോര് കടുക്കുന്നതിനിടെ സർക്കാരിന് പ്രതിരോധമായി നിർണ്ണായക രേഖകൾ പുറത്ത്. വീര്യം കുറഞ്ഞ മദ്യം വിൽക്കാനുള്ള നീക്കങ്ങൾക്ക് തുടക്കമിട്ടത് 18 വർഷങ്ങൾക്ക് മുൻപ് ഭരിച്ചിരുന്ന വി.എസ്. അച്യുതാനന്ദൻ സർക്കാരിന്റെ കാലത്താണെന്ന് വ്യക്തമാക്കുന്ന സർക്കാർ രേഖകളാണ് ഇപ്പോൾ പുറത്തുവന്നിരിക്കുന്നത്.
പ്രശസ്ത അന്താരാഷ്ട്ര മദ്യ കമ്പനിയായ ബക്കാർഡി (Bacardi) ഈ ആവശ്യം ഉന്നയിച്ച് അന്ന് സർക്കാരിനെ സമീപിച്ചിരുന്നുവെന്നും 2008-ൽ ഈ പ്രൊപ്പോസൽ വി.എസ് സർക്കാർ ഔദ്യോഗികമായി അംഗീകരിച്ചിരുന്നുവെന്നും രേഖകൾ വ്യക്തമാക്കുന്നു. പുറത്തുവന്ന ഔദ്യോഗിക വിവരങ്ങൾ പ്രകാരം, 2008-ൽ ബക്കാർഡി കമ്പനിയുടെ അപേക്ഷ സ്വീകരിച്ച വി.എസ് സർക്കാർ വിഷയത്തിൽ തുടർനടപടികൾ സ്വീകരിക്കുന്നതിനായി നികുതി സെക്രട്ടറി വഴി എക്സൈസ് കമ്മിഷണർക്ക് പ്രത്യേക കത്ത് നൽകിയിരുന്നു. നിലവിലെ ബജറ്റിൽ വീര്യം കുറഞ്ഞ മദ്യത്തിന് നികുതി ഇളവ് പ്രഖ്യാപിച്ചതിനെതിരെ പ്രതിപക്ഷം വൻ അഴിമതി ആരോപണം ഉന്നയിക്കുന്നതിനിടയിലാണ് ഈ രേഖകൾ പുറത്തുവരുന്നത് എന്നത് ഭരണപക്ഷത്തിന് വലിയ രാഷ്ട്രീയ ആയുധമായി മാറിയിരിക്കുകയാണ്.
നേരത്തെ, പുതിയ ബജറ്റ് പ്രഖ്യാപനത്തിൽ മദ്യ കമ്പനിയായ ബക്കാർഡിയുടെ അപേക്ഷ സ്വീകരിച്ച് അതിവേഗത്തിലാണ് നികുതി കുറയ്ക്കാനുള്ള തീരുമാനം എടുത്തതെന്നും ഇതിന് പിന്നിൽ വൻ അഴിമതിയുണ്ടെന്നും പ്രതിപക്ഷം നിയമസഭയിൽ ആരോപിച്ചിരുന്നു. ഇതേച്ചൊല്ലി സഭയിൽ വലിയ തർക്കമാണ് ഉടലെടുത്തത്. തുടർന്ന് ഭരണപക്ഷത്തുനിന്നും ശക്തമായ ആവശ്യം ഉയർന്നതിനെത്തുടർന്ന് പ്രതിപക്ഷം ഉന്നയിച്ച ഈ അഴിമതി ആരോപണം സഭാ രേഖകളിൽ നിന്നും നീക്കം ചെയ്യുകയായിരുന്നു. എന്നാൽ സഭയ്ക്ക് പുറത്ത് നടത്തിയ വാർത്താ സമ്മേളനത്തിലും പ്രതിപക്ഷം തങ്ങളുടെ അഴിമതി ആരോപണത്തിൽ ഉറച്ചുനിൽക്കുകയാണെന്ന് വ്യക്തമാക്കി. വിഷയത്തിൽ പ്രതിപക്ഷം നൽകിയ അടിയന്തിര പ്രമേയ നോട്ടീസ് സ്പീക്കർ നിരാകരിച്ചതിന് പിന്നാലെയാണ് സഭയ്ക്ക് പുറത്തും സമരം ശക്തമാക്കാൻ യുഡിഎഫ് തീരുമാനിച്ചത്. ബജറ്റ് ചർച്ചയുടെ ആദ്യ ദിവസം തന്നെ ഉയർന്നുവന്ന ഈ നികുതി കുറയ്ക്കൽ പ്രഖ്യാപനം സർക്കാരിനെ വലിയ രീതിയിൽ പ്രതിരോധത്തിലാക്കിയിരുന്നു. എന്നാൽ 2008-ലെ വി.എസ് സർക്കാരിന്റെ ഭരണാനുമതി രേഖകൾ ഇപ്പോൾ പുറത്തുവന്നതോടെ പ്രതിപക്ഷത്തിന്റെ അഴിമതി ആരോപണങ്ങളുടെ മൂർച്ച കുറയ്ക്കാനാകുമെന്ന പ്രതീക്ഷയിലാണ് ഭരണപക്ഷം.
