മുഖ്യമന്ത്രി വി.ഡി. സതീശന്റെ ഗുരുവായൂർ ദർശനം… ഭക്തരെ തടഞ്ഞെന്ന് ബിജെപി… ഹൈബി ഈഡൻ നിയമലംഘനം നടത്തിയെന്നും പരാതി

ഗുരുവായൂർ: മുഖ്യമന്ത്രി വി.ഡി. സതീശന്റെ ഗുരുവായൂർ ക്ഷേത്ര സന്ദർശനവും വിഐപി ദർശനവും വലിയ രാഷ്ട്രീയ വിവാദത്തിലേക്ക്. മുഖ്യമന്ത്രിയുടെ സന്ദർശനം കാരണം മണിക്കൂറുകളോളം കാത്തുനിന്ന സാധാരണക്കാരായ ഭക്തരുടെ ദർശനം തടസ്സപ്പെട്ടുവെന്ന് ആരോപിച്ച് ബിജെപി രംഗത്തെത്തി. ഇതുമായി ബന്ധപ്പെട്ട് ബിജെപി നേതാവ് ബി. ഗോപാലകൃഷ്ണൻ ഗുരുവായൂർ ദേവസ്വം അഡ്മിനിസ്ട്രേറ്റർക്ക് ഔദ്യോഗികമായി പരാതി നൽകി. മുഖ്യമന്ത്രിയുടെ സന്ദർശന വേളയിൽ നടന്ന കാര്യങ്ങൾ ഹൈക്കോടതി ഉത്തരവുകളുടെ ലംഘനമാണെന്ന് ബിജെപി കുറ്റപ്പെടുത്തി.

ക്ഷേത്രത്തിൽ കടുത്ത സുരക്ഷാ ക്രമീകരണങ്ങൾ ഏർപ്പെടുത്തിയതിനെ തുടർന്ന് ഭക്തർക്ക് നേരിടേണ്ടി വന്ന ബുദ്ധിമുട്ടുകളും എം.പി നടത്തിയ നിയമലംഘനവുമാണ് പരാതിയിൽ പ്രധാനമായും ചൂണ്ടിക്കാണിക്കുന്നത്. തലേദിവസം രാത്രി 11 മണി മുതൽ ദർശനത്തിനായി വരിനിന്ന നിരവധി ഭക്തർക്ക് മുഖ്യമന്ത്രിയുടെയും സംഘത്തിന്റെയും പ്രത്യേക ദർശനം കാരണം ഒടുവിൽ ദർശനം ലഭിക്കാതെ മടങ്ങേണ്ടി വന്നുവെന്ന് ബിജെപി ആരോപിക്കുന്നു. വീഡിയോ ചിത്രീകരണത്തിന് കർശന വിലക്കുള്ള ക്ഷേത്രത്തിലെ അതീവ സുരക്ഷിത മേഖലയിൽ വെച്ച് ഹൈബി ഈഡൻ എം.പി വീഡിയോ ചിത്രീകരണം നടത്തിയെന്നും ഇത് നിയമലംഘനമാണെന്നും പരാതിയിൽ പറയുന്നു.

റവന്യൂ വകുപ്പ് മന്ത്രി എ.പി. അനിൽകുമാറിന്റെ മകന്റെ വിവാഹത്തിൽ പങ്കെടുക്കാനായാണ് മുഖ്യമന്ത്രി വി.ഡി. സതീശൻ ഗുരുവായൂരിൽ എത്തിയത്. മന്ത്രിമാരും ജനപ്രതിനിധികളും ഉൾപ്പെടെ വലിയൊരു നിര തന്നെ വിവാഹത്തിൽ പങ്കെടുക്കാൻ ക്ഷേത്ര പരിസരത്ത് എത്തിയിരുന്നു. ഇതിനാൽ വലിയ സുരക്ഷാ സന്നാഹമാണ് പോലീസ് ഇവിടെ ഒരുക്കിയിരുന്നത്. അതേസമയം, രാഷ്ട്രീയ ചരിത്രത്തിൽ കെ. കരുണാകരന് ശേഷം ഗുരുവായൂർ ക്ഷേത്രത്തിൽ പ്രവേശിക്കുന്ന ആദ്യത്തെ കോൺഗ്രസ് മുഖ്യമന്ത്രി കൂടിയാണ് വി.ഡി. സതീശൻ എന്ന പ്രത്യേകതയുമുണ്ട്.