കൊച്ചി കുമ്പളങ്ങിയിൽ പച്ചക്കറി കടയ്ക്കുള്ളിൽ മധ്യവയസ്കൻ വെട്ടേറ്റ് മരിച്ച നിലയിൽ….. തമിഴ്നാട് സ്വദേശി മാഹിനാണ് കൊല്ലപ്പെട്ടത്
കൊച്ചി: എറണാകുളം കുമ്പളങ്ങിയിൽ മധ്യവയസ്കനെ വെട്ടിക്കൊന്ന നിലയിൽ കണ്ടെത്തി. തമിഴ്നാട് സ്വദേശിയായ മാഹിൻ ആണ് മരിച്ചത്. കുമ്പളങ്ങി മാർക്കറ്റിലെ പച്ചക്കറി കടയ്ക്കുള്ളിലാണ് ഇന്ന് രാവിലെ ചോര വാർന്ന നിലയിൽ മാഹിന്റെ മൃതദേഹം കണ്ടെത്തിയത്. ഇന്ന് പുലർച്ചെയോടെയാണ് അതിക്രൂരമായ ഈ ആക്രമണം നടന്നതെന്നാണ് പോലീസിന്റെ പ്രാഥമിക നിഗമനം.
കൊല്ലപ്പെട്ട മാഹിൻ കുമ്പളങ്ങിയിലെ പച്ചക്കറി കടയ്ക്ക് സമീപം കുട നന്നാക്കി നൽകുന്ന തൊഴിൽ ചെയ്തുവരികയായിരുന്നു. ഈ പച്ചക്കറി കടയ്ക്ക് തൊട്ടടുത്തുള്ള ചെറിയൊരു മുറിയിലായിരുന്നു ഇയാൾ താമസിച്ചിരുന്നതും. കഴിഞ്ഞ ദിവസം രാത്രി മാഹിനും മറ്റ് രണ്ട് പേരും കൂടി കടയ്ക്ക് സമീപത്തിരുന്ന് മദ്യപിച്ചിരുന്നതായി പോലീസിന് വിവരം ലഭിച്ചിട്ടുണ്ട്. ഇവർ തമ്മിൽ മദ്യലഹരിയിലുണ്ടായ കടുത്ത വാക്കുതർക്കവും കൈയാങ്കളിയുമാകാം ഒടുവിൽ ദാരുണമായ കൊലപാതകത്തിലേക്ക് നയിച്ചതെന്നാണ് പോലീസ് സംശയിക്കുന്നത്. സംഭവം നടന്ന മാർക്കറ്റിലെയും സമീപത്തെയും സിസിടിവി ദൃശ്യങ്ങൾ കേന്ദ്രീകരിച്ച് പോലീസ് അന്വേഷണം ഊർജ്ജിതമാക്കിയിട്ടുണ്ട്. മാഹിനൊപ്പം രാത്രി മദ്യപിക്കാനുണ്ടായിരുന്ന ആ രണ്ട് പേർ ആരാണെന്ന് കണ്ടെത്താനുള്ള ശ്രമത്തിലാണ് പോലീസ്. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റും.
