ജഡ്ജി നിയമനം…. കേന്ദ്രസര്‍ക്കാരിന് സുപ്രീംകോടതി നോട്ടീസ്

സുപ്രീം കോടതിയിലും ഹൈക്കോടതികളിലും ജഡ്ജിമാരെ നിയമിക്കുന്നതിനുള്ള പരിഷ്‌കരിച്ച ‘മെമ്മോറാണ്ടം ഓഫ് പ്രൊസീജ്യര്‍’ (MoP) അന്തിമമായി തീരുമാനിക്കുന്നതിലെ കാലതാമസം ചോദ്യം ചെയ്തുകൊണ്ടുള്ള ഹര്‍ജിയില്‍ കേന്ദ്രസര്‍ക്കാരിന് നോട്ടീസ്. ജഡ്ജിമാരുടെ നിയമന പ്രക്രിയയുമായി ബന്ധപ്പെട്ട് ‘ലോക് പ്രഹാരി’ എന്ന എന്‍ജിഒ ആണ് സുപ്രീംകോടതിയില്‍ പൊതുതാല്‍പ്പര്യ ഹര്‍ജി സമര്‍പ്പിച്ചത്.

കൊളീജിയം എടുക്കുന്ന തീരുമാനങ്ങള്‍ വിവരാവകാശ നിയമത്തിന്റെ (Right to Information Act) പരിധിയില്‍ കൊണ്ടുവരണമെന്നും ഹര്‍ജിയില്‍ ആവശ്യപ്പെടുന്നു. ഹര്‍ജി പരിഗണിച്ച ജസ്റ്റിസുമാരായ എംഎം സുന്ദരേഷ്, പി ബി വരാലെ എന്നിവരടങ്ങിയ ബെഞ്ചാണ് മറുപടി നല്‍കാന്‍ നിര്‍ദേശിച്ചുകൊണ്ട് കേന്ദ്രസര്‍ക്കാരിന് നോട്ടീസ് അയച്ചത്.

കേന്ദ്ര സര്‍ക്കാരും സുപ്രീം കോടതിയും തമ്മില്‍ പലതവണ ആശയവിനിമയം നടത്തിയെങ്കിലും, പരിഷ്‌കരിച്ച ‘മെമ്മോറാണ്ടം ഓഫ് പ്രൊസീജ്യര്‍’ (MoP) 11 വര്‍ഷമായിട്ടും അന്തിമരൂപത്തിലായിട്ടില്ല എന്ന് ഹര്‍ജിയില്‍ ചൂണ്ടിക്കാട്ടുന്നു. സുപ്രീം കോടതി, ഹൈക്കോടതികള്‍ തുടങ്ങിയവയിലേക്ക് ജഡ്ജിമാരെ നിയമിക്കുന്നതിന് ഉദ്യോഗാര്‍ത്ഥികളെ വിലയിരുത്തുന്നതിനും തിരഞ്ഞെടുക്കുന്നതിനുമുള്ള വ്യക്തമായ മാനദണ്ഡങ്ങള്‍ ഇല്ലെന്നും, അത്തരം മാനദണ്ഡങ്ങള്‍ പരസ്യമാക്കണമെന്നും ഹര്‍ജിയില്‍ ആവശ്യപ്പെടുന്നു.

Related Articles

Back to top button