ജിഎൻഎയുമായി വൈദ്യുതി വാങ്ങൽ കരാറില്ല… സമ്മർദ്ദം ചെലുത്തി ഒപ്പിടുവിക്കാൻ ശ്രമമെന്ന്…

തിരുവനന്തപുരം: വൈദ്യുതി വാങ്ങൽ വിവാദത്തിൽ ജിഎൻഎയുമായി വൈദ്യുതി ബോർഡ് കരാറൊന്നും ഒപ്പിട്ടിട്ടില്ലെന്ന് മുഖ്യമന്ത്രി വിഡി സതീശൻ. ജിഎൻഎയുമായി കരാർ ഉണ്ടാക്കിയെന്ന ആരോപണം തള്ളിയ മുഖ്യമന്ത്രി, കരാറിൽ ഒപ്പിടാൻ സമ്മർദ്ദം ചെലുത്താനുള്ള ശ്രമമാണ് നടന്നതെന്നും വ്യക്തമാക്കി.ഹിമാചൽ വൈദ്യുതിയിൽ നിന്നും ജിഎൻഎയിൽ നിന്നും വൈദ്യുതി വാങ്ങുന്നതിനായി രണ്ട് പ്രൊപ്പോസലുകളാണ് ലഭിച്ചത്. ഇതിൽ കൂടുതൽ ലാഭകരമെന്ന് തോന്നിയതിനാലാണ് ജിഎൻഎയുടെ പ്രൊപ്പോസൽ പരിഗണിച്ചതെന്നും മുഖ്യമന്ത്രി വാർത്താസമ്മേളനത്തിൽ പറഞ്ഞു.

എന്നാൽ ഇതിന്റെ അടിസ്ഥാനത്തിൽ കരാറുണ്ടാക്കിയിട്ടില്ലെന്നും അദ്ദേഹം ആവർത്തിച്ചു. വൈദ്യുതി വാങ്ങൽ വിഷയം മന്ത്രിസഭാ യോഗത്തിൽ ചർച്ചയായിട്ടില്ലെന്നും മുഖ്യമന്ത്രി വ്യക്തമാക്കി. പത്ത് വർഷം ഭരിച്ച സർക്കാർ ഇക്കാര്യത്തിൽ എന്താണ് ചെയ്തതെന്ന് ചോദിച്ച അദ്ദേഹം, പ്രതിപക്ഷ നേതാവിന് ഏത് രേഖയാണ് വേണ്ടതെന്നും ചോദിച്ചു. എല്ലാ നടപടികളും കൃത്യമായാണ് നടക്കുന്നതെന്നും മുഖ്യമന്ത്രി അവകാശപ്പെട്ടു. അതേസമയം, മുൻ മുഖ്യമന്ത്രി പിണറായി വിജയൻ വിഷയത്തിൽ പരസ്പരവിരുദ്ധമായ കാര്യങ്ങളാണ് പറയുന്നതെന്ന് വിഡി സതീശൻ ആരോപിച്ചു. ഇപ്പോൾ സിപിഎം സംസ്ഥാന സെക്രട്ടറി എംവി ഗോവിന്ദനും വിഷയത്തിൽ ഇടപെട്ടിട്ടുണ്ട്. ഗോവിന്ദന് കാര്യങ്ങൾ എന്താണെന്ന് പോലും മനസ്സിലായിട്ടില്ലെന്നായിരുന്നു മുഖ്യമന്ത്രിയുടെ പരിഹാസം. യുഡിഎഫ് കൺവീനർ അടൂർ പ്രകാശിന്റെ അഭിപ്രായങ്ങളോട് പ്രതികരിക്കാൻ മുഖ്യമന്ത്രി തയ്യാറായില്ല. നിയമനിർമ്മാണം ഉൾപ്പെടെയുള്ള കാര്യങ്ങൾ പരിഗണിക്കുന്നതിനായി നവംബർ 30 മുതൽ ഡിസംബർ 10 വരെ നിയമസഭാ സമ്മേളനം ചേരാനും തീരുമാനിച്ചിട്ടുണ്ട്.